जळगाव (प्रतिनिधी) शहरातील जळगाव-भुसावळ रोडवरील स्वामी नारायण मंदिरासमोर दूरदर्शन टॉवरजवळ गोवंश मांसाची वाहतूक करणाऱ्या आरोपीवर एमआयडीसी पोलिसांनी कारवाई करत सुमारे 70 किलो मांसासह मुद्देमाल हस्तगत केला आहे.
दिनांक 1 फेब्रुवारी 2026 रोजी सकाळी सुमारे 8.25 वाजता पोलिसांना मिळालेल्या माहितीनुसार आरोपी शेख जमीर मेहबुब (वय 54, रा. उस्मानिया पार्क, शिवाजी नगर, जळगाव) हा त्याच्या ताब्यातील बजाज कंपनीच्या MH 19 V 7745 क्रमांकाच्या तीन चाकी रिक्षामध्ये गोवंश जनावराची कत्तल करून त्याचे तुकडे विक्री करण्याच्या उद्देशाने वाहतूक करत असल्याचे आढळून आले. पोलिसांनी तातडीने कारवाई करत आरोपीस ताब्यात घेत सुमारे 70 किलो वजनाचे गोवंश मांस हस्तगत केले. याप्रकरणी एमआयडीसी पोलीस ठाण्यात गुन्हा क्रमांक 083/2026 महाराष्ट्र पशु संरक्षण अधिनियम कलम 5, 5(क), 9, 9(अ) अन्वये गुन्हा दाखल करण्यात आला आहे.
ही कारवाई एमआयडीसी पोलीस ठाण्याचे पोलीस निरीक्षक बबन आव्हाड यांच्या मार्गदर्शनाखाली ग्रेपोउपनि राजेंद्र उगले, पोहेकॉ रामदास कुंभार, पोहेकॉ गिरीश पाटील, सफौ विजय सिंग पाटील, पोना प्रदीप चौधरी व पोलीस कॉन्स्टेबल विनोद आस्कर यांनी केली. या गुन्ह्याचा पुढील तपास पोहेकॉ रामदास कुंभार करीत आहेत.
सदरची कारवाई पोलीस अधीक्षक डॉ. माहेश्वरी रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे व पोलीस निरीक्षक बबन आव्हाड यांच्या मार्गदर्शनाखाली करण्यात आली आहे.
