चोपडा (प्रतिनिधी) – शहरातील धनवाडी रोडवरील ग्रामसेवक कॉलनी परिसरातील शशिकांत नगर येथे विनापरवाना गावठी कट्टा व जिवंत काडतुसे बाळगणाऱ्या २४ वर्षीय तरुणाला चोपडा शहर पोलिसांनी अटक केली. १९ ऑक्टोबरला केलेल्या या कारवाईत कार, अग्निशस्त्र, काडतुसे, मोबाईल फोन व अन्य साहित्य असा एकूण ८ लाख ३० हजार रुपयांचा मुद्देमाल जप्त करण्यात आला.
पोलिसांना सार्वजनिक ठिकाणी एक व्यक्ती बेकायदेशीररीत्या अग्निशस्त्र बाळगून असल्याची माहिती मिळाली होती. त्यानुसार पोलिसांनी पंचांसमक्ष कारवाई करत जयेश दिलीप पाटील (वय २४, रा. सुरत, गुजरात) याची झडती घेतली. त्याच्याकडून गावठी कट्टा, चार जिवंत काडतुसे, ९ एमएमची चार रिकामी काडतुसे, पाच मोबाईल फोन व सिमकार्ड असा मुद्देमाल जप्त केला. याशिवाय पांढऱ्या रंगाची कारही (जीजे- ०५, आरके – ३१२७) जप्त करण्यात आली. पोलिसांनी अटक केलेल्या जयेश पाटील याच्यावर यापूर्वी अनेक गुन्हे दाखल आहेत. घटनेचे गांभीर्य लक्षात घेऊन रात्री आठ वाजेच्या सुमारास फॉरेन्सिक पथकाला घटनास्थळी पाचारण करण्यात आले. पथकाने घटनास्थळावरून तांत्रिक पुरावे गोळा केले. या घटनेमुळे दाट वस्तीच्या शशिकांत नगर परिसरात नागरिकांमध्ये भीतीचे वातावरण निर्माण झाले आहे. याप्रकरणी चोपडा शहर पोलीस ठाण्यात गुन्हा दाखल करण्यात आला आहे. पोलीस निरीक्षक पवन देसले यांच्या मार्गदर्शनाखाली पोलीस उपनिरीक्षक चेतन परदेशी पुढील तपास करत आहेत.
