जळगाव (प्रतिनिधी) आयटीआय झाल्यानंतर बांभोरी येथील कंपनीत ट्रेनिंगसाठी जात असलेल्या तरुणांच्या दुचाकीला वाळू वाहतुक करणाऱ्या वाहनाने धडक दिली. या अपघातात उमाकांत गणेश सपकाळे (वय २२, रा. धामणगाव, ता. जळगाव) हा तरुण जागीच ठार झाला, तर त्याच्यासोबतचा हितेंद्र बन्सीलाल सपकाळे (वय २०, रा. धामणगाव) हा गंभीर जखमी झाला. ही घटना मंगळवारी रात्री सव्वा अकरा वाजेच्या सुमारास विदगाव गावाजळील पाईप फॅक्टरीजवळ घडली. याप्रकरणी वाहन चालकाविरुद्ध तालुका पोलिसात गुन्हा दाखल करण्यात आला आहे.
जळगाव तालुक्यातील धामणगाव येथील उमकांत सपकाळे व त्याचा मित्र हितेंद्र सपकाळे दोघांचा आयटीआय झाला आहे. बांभोरी येथील एका कंपनीत ते अकरा महिन्यांसाठी ट्रेनिंग घेत होते. नाईट ड्युटी असल्याने मंगळवारी रात्रीच्या सुमारास (एमएच १९, डीई ६३७७) क्रमांकाच्या दुचाकीवरुन कंपनीत जाण्यासाठी निघाले. विदगावजवळील एका पेट्रोल पंपावर त्यांनी दुचाकीमध्ये पेट्रोल भरले त्यानंतर जळगावच्या दिशेने निघाले. रस्त्यावरील पाईप फॅक्टरीच्या पुढे काही अंतरावर मागून भरधाव वेगाने वाळू वाहतुक करणाऱ्या (एमएच ०४, जीसी २४२३) क्रमांकाच्या मालवाहू वाहनाने दुचाकीला धडक दिली. या धडकेत दोघे दुचाकीस्वार तरुण दुचाकीसह रस्त्याच्या कडेला फैकले गेले. यामध्ये उमकांत सपकाळे याला गंभीर दुखापत झाल्याने त्याचा जागीच मृत्यू हितेंद्र गंभीर झाला होता.
अपघातातील जखमींना तात्काळ खासगी वाहनातून शासकीय वैद्यकीय महाविद्यालय व रुग्णालयात दाखल केले. याठिकाणी डॉक्टरांनी उमाकांत याची तपासणी करीत त्याला मयत घोषीत केले, तर त्याच्या मित्रावर रुग्णालयात उपचार सुरु आहेत. वाळूची वाहतुक करणाऱ्या वाहनाने तरुणांच्या दुचाकीला दिलेली धडक इतकी जोरात होती की, दोघ दुचाकीस्वार हे रस्त्याच्या कडेला फेकले गेले. तर वाळू वाहतुक करणारे वाहन हे देखील उलटले होते. या घटनेनंतर वाहन चालक घटनास्थळाहून पसार झाला.
