नेवासे ( जि. नगर) शनिशिंगणापूर येथून देवदर्शन करून निघालेल्या भाविकांची भरधाव कार दुभाजकाला धडकून दुसऱ्या लेनवरून जाणाऱ्या आयशर टेम्पोला धडकली. यात कारमधील चार जण ठार झाले, तर एक महिला गंभीर जखमी झाली. कार चालकाला डुलकी लागल्याने हा अपघात झाल्याचा प्राथमिक अंदाज आहे.
छत्रपती संभाजीनगर- अहमदनगर महामार्गावरील वडाळा बहिरोबा (ता. नेवासे) गावाजवळ रविवारी ११ वाजता हा अपघात झाला. मृतांमध्ये तीन जण मध्य प्रदेशचे, तर एक नेवासे तालुक्यातील आहे. राहुल परमेश्वर शर्मा (वय २७, रा. कलंदी गोल्ड सिटी, इंदौर, मध्य प्रदेश), हर्ष मनोहर शर्मा (वय १८, रा. रतलाम, मध्य प्रदेश), योगेश परमेश्वर शर्मा (वय २४, रा. कुंडली, जि. धार, मध्य प्रदेश), अविनाश मंडलेचा (वय २५, रा. महालक्ष्मी हिवरे, ता. नेवासा) अशी मृतांची नावे आहेत. राणू परमेश्वर शर्मा (वय २६, रा. गोल्ड सिटी, इंदौर) असे जखमी महिलेचे नाव आहे. राहुल व योगेश सख्खे भाऊ असून, राहुल यांची पत्नी जखमी आहे, त्यांचे नाव समजू शकलेले नाही. तर, हर्ष हा राहुल यांचा मेहुणा आहे.
लक्ष्मी हिवरा येथील अविनाश मंडलेचा मित्रांसह शनिशिंगणापूरला गेले होते. तेथे दर्शन घेऊन देवगड येथे दर्शनासाठी जात होते. साडेनऊच्या सुमारास कारच्या चालकाचे नियंत्रण सुटले. त्यामुळे कार दुभाजकावर आदळली. तसेच समोरून येणाऱ्या टेम्पोला कारची धडक बसली. अपघात एवढा भीषण होता की कारमधील तिघांचा जागीच मृत्यू झाला. तर एकाचा रुग्णालयात नेत असतांना मृत्यू झाला. त अपघातात आणखी एक महिला जखमी असून त्यांच्यावर नेवासा येथील खाजगी रुग्णालयात उपचार सुरु आहेत. दरम्यान, इंदूर येथील मृत बँकिंग क्षेत्राशी संबंधित असून मंडलेचा हे सीए होते.
