चोपडा (प्रतिनिधी) – वडिलोपार्जित असलेल्या प्रॉपर्टीवर काय काम सुरू केले, असे विचारल्याचा राग आल्याने मोठा भाऊ आशिष युवराज जयस्वाल याने लहान भाऊ दीपक जयस्वाल यास शिवीगाळ करत मारहाण केल्याप्रकरणी आशिष जयस्वाल याच्यावर चोपडा पोलीस ठाण्यात गुन्हा दाखल करण्यात आला आहे.
शहरातील नायरा पेट्रोल पंपाच्या बाजूला असलेल्या वडिलोपार्जित जागेत शहरातील धनवाडी फाटा येथील आशिष जसवाल (वय ४२) हे जेसीबीने साफसफाई करत होते. त्या ठिकाणी हरेश्वर कॉलनीत राहणारे त्यांचे लहान बंधू दीपक जयस्वाल (वय ३९) हे गेले. त्यांनी काय काम सुरू केले आहे, असे आशिष यांना विचारले. त्यावर आशिष जयस्वालने दीपकला, तू येथे कुणाला विचारून आलास, असे म्हणत आशिषने दीपकला शिवीगाळ करत मारहाण केली. तसेच गळ्यातील ८ ग्रॅम सोन्याची चैन काढून घेतली. या झटापटीत दीपक यांच्या कानाला मोठी इजा झाली आहे. या प्रकरणी दीपक जयस्वाल यांच्या फिर्यादीवरून आशिष जयस्वाल याच्याविरोधात चोपडा शहर पोलीस ठाण्यात गुन्हा दाखल करण्यात आला आहे. या घटनेचा तपास पोलीस उपनिरीक्षक सचिन चौधरी करत आहेत. दरम्यान, यापूर्वीही दीपक जयस्वाल यांच्या फिर्यादीवरून आशिष जयस्वाल यांच्यावर विविध कलमान्वये गुन्हा | दाखल करण्यात आला आहे.
