धरणगाव (प्रतिनिधी) तालुक्यातील जांभोरा गावाजवळ शुक्रवारी झालेल्या अपघातात एकाला आपला जीव गमवावा लागला आहे. रस्त्याचे काम सुरु असलेल्या ठिकाणी रात्रीच्या वेळी कुठलेही सुरक्षा दर्शक सूचना नसल्यामुळे एकाच ठिकाणी एकाच आठवड्यात दुसरा अपघात झाला आहे. या संबंधी दोषींवर कारवाईची मागणी होत आहे.
या संदर्भात अधिक असे की, नरेंद्र राजू बेंडवाल (वय ३१, रा.डीडी नगर पारोळा) हे दि.२३ डिसेंबर रोजी रात्री आपली दुचाकी (क्र.एमएच.१९,डीझेड.६६९६) ने धरणगावहून पारोळा जात होते. धरणगाव ते पारोळा रोडवर जांभोरा गावाजवळ धरणगावकडील पुलाचे बांधकाम सुरु असल्याने तेथे पाण्याचे टॅकर उभे होते. रात्री साधारण ११ वाजेच्या सुमारास रस्त्याचे काम सुरु असल्याबाबत सूचना नसल्यामुळे नरेंद्र बेंडवाल यांना रस्त्यावर उभे असलेले टॅकर दिसले नाही. त्यामुळे त्यांची दुचाकीने सरळ टॅकरला धडक दिली. या अपघात त्यांचा जागीच मृत्यू झाला. या प्रकरणी आकाश पचेरवार (रा. रामदेवसजीबाबा नगर , धरणगाव) यांच्या फिर्यादीवरून गुन्हा दाखल करण्यात आला असून पुढील तपास पो.ना. दीपक पाटील हे करीत आहेत.
एकाच ठिकाणी एका आठवड्यात दुसरा अपघात
मागील आठवड्यात दि.१७ डिसेंबर रोजी रात्री १२ वाजेच्या सुमारास शाम भास्कर पाटील (वय ४०, रा. मंगरूळ ता. पारोळा) व जयवंत गोरख पाटील (वय २८, रा. मंगरूळ ता. पारोळा) असे प्लाटिना मोटार सायकल (क्र. MH १९ DW ५७८७) ने मित्र किरण भास्कर रोकडे (रा. धानोरे ता. धरणगाव) यांच्या हळदीचा कार्यक्रम आटोपून घरी परत जात होते. धरणगाव ते पारोळा रोडवर जांभोरा गावाजवळ धरणगावकडील पुलाचे बांधकाम सुरु असल्याने शाम पाटील याच्या ताब्यातील मोटर सायकलचा वेग नियंत्रित न झाला नाही. त्यामुळे मोटार सायकल स्लिप होत जयवंत पाटील हा तरुण मयत झाला होता.
दोषींवर कारवाईची मागणी !
रस्त्याच्या काम सुरु असल्यामुळे १०० मीटर अंतरावर त्यासंबधी सूचना फलक रेडीअमने लावलेले असले पाहिजे. जेणे करून वाहन धारकांना आपल्या वाहनांचा वेग कमी करण्यास वेळ मिळेल. परंतू या ठिकाणी कोणतेही काळजी घेण्यात आलेली नाही. एकाच आठवड्यात दोन तरुणांना आपला जीव गमवावा लागला असून त्यांचे संसार उघडे पडले आहेत. त्यामुळे दोषी अधिकारी आणि ठेकेदार यांच्यावर सदोष मनुष्यवधाचा गुन्हा दाखल झाला पाहिजे, अशी मागणी सामाजिक कार्यकर्ते धीरेंद्र पुरभे यांनी केली आहे.
