छत्रपती संभाजीनगर (वृत्तसंस्था) रांजणात बुडून एका तीन वर्षीय चिमुकलीचा मृत्यू झाला. ही घटना पिशोर येथील शफेपूर भागातील रविवारी (दि. ५) सायंकाळी घडली. बेदिका काशिनाथ हरणकाळ असे मयत बलिकेचे नाव आहे.
काशिनाथ नारायण हरणकाळ यांच्या चार मुलींपैकी बेदिका ही एक मुलगी आहे. बेदीकाचे आई व वडील हे मजूर असल्याने कामावर गेले होते. तत्पूर्वी गावातच सासूरवाडी असल्याने त्यांनी बेदीकाला सासऱ्याकडे सोडून गेले होते. बेदीका ही खेळत असताना अचानक रांजणात पडली. दुपारी ४ वाजता बेदीका घरात नसल्याने शोध घेण्यास सुरुवात करण्यात आली.
अखेर सायंकाळी साडेसात वाजता ती घराजवळील पाण्याच्या रांजनात डोक्यावर पडलेल्या अवस्थेत आढळून आली. तिला तात्काळ ग्रामीण रुग्णालयात दाखल केले असता डॉक्टरांनी तपासून मृत घोषित केले. शफेपूर येथील स्मशानभूमीत तिच्यावर अंत्यसंस्कार करण्यात आले.
