जळगाव (प्रतिनिधी) भुसावळहून एमआयडीतील कंपनीत कामावर येत असलेल्या कामगाराला भरधाव अज्ञात वाहनाने धडक दिली. या अपघातात महेंद्र एकनाथ बोंडे (वय ३८, रा. गणेशकॉलनी, भुसावळ) हे रस्त्यावर पडले. यावेळी त्यांच्या डोक्यावरुन चाक गेल्याने त्यांचा दुर्देवी मृत्यू झाला. ही घटना खेडीजवळील नाल्यावरील पुलावर घडली. हा अपघात इतका भीषण होता की, बोंडे यांच्या डोक्याचा अक्षरशः चेंदामेंदा झाला होता.
भुसावळातील गणेश कॉलनीत राहणारे महेंद्र बोंडे हे जळगावच्या एमआयडीसीतील गणेश अॅल्युमिनियम कंपनीत कामाला होते. दररोज ते दुचाकीने कामावर येत होते, नेहमीप्रमाणे शनिवार दि. २९ रोजी सकाळी महेंद्र बोंडे हे ( एमएच १९, बीडी ०६०२) क्रमांकाच्या दुचाकीने कामावर येण्यासाठी निघाले. जळगावपासून अवघ्या काही अंतरावर कामावर येत असलेल्या महेंद्र बोर्डे यांच्या दुचाकीला खेडी फाट्याजवळील अरुंद पुलावर अज्ञात वाहनाने जोरदार धडक दिली. त्यामुळे ते रस्त्यावर पडले व त्यांच्या डोक्यावरून चाक गेल्याने त्यांचा जागीच मृत्यू झाला. या अपघातानंतर वाहन चालक हा वाहनासह पसार झाला.
