पाचोरा (प्रतिनिधी) लग्नास नकार दिल्याच्या कारणावरून संतप्त झालेल्या तरुणीने एका तरुणावर चक्क धारदार चाकूने हल्ला चढवत जखमी केल्याची घटना घडल्याने परिसरात खळबळ उडाली आहे. जखमी तरुणावर येथील खासगी रुग्णालयात उपचार सुरू असून जखमी तरुणाच्या बहिणीच्या फिर्यादीवरून तरुणी विरुध्द पाचोरा पोलिसात गुन्हा नोंदवण्यात आला आहे. तर हल्ला करणाऱ्या तरुणीला अटक करण्यात आली आहे.
पाचोरा शहरातील भडगाव रोडवरील एका कॉलनीत राहणाऱ्या तरुणाविरुद्ध बस स्थानक रोड परीसरातील तरुणीने २०१३ मध्ये विनयभंगाचा गुन्हा दाखल केला होता. त्यानंतर या तरुणीने अनेकवेळा तरुणाकडे माझ्याशी लग्न कर, असा तगादा लावला होता. दरम्यान, या तरुणाला नोकरी लागली असून या तरुणीने तेथेही जाऊन त्याला लग्नाचा आग्रह केला होता. ही माहिती तरुणाने त्याच्या बहिणीला दिली होती. दरम्यान, १५ रोजी रात्री ९.३० वाजेच्या सुमारास तरुणाच्या घराबाहेर येऊन या तरुणीने आरडाओरड व शिवीगाळ केली. या वेळी तरुणाच्या आईने त्या तरुणीला शांत राहण्याचा सल्ला दिला. त्यानंतर तरुणीने चाकू काढून त्या महिलेला मारणार तोच त्यांच्या पतीने तरुणीला रोखले. त्यांनाही या तरुणीने लाथ मारली.
यावेळी त्या तरुणासह परिसरातील नागरिकांनी तरुणीला समजावण्याचा प्रयत्न केला. मात्र, ती ऐकण्याच्या मनस्थितीत नव्हती. यावेळी पुन्हा लग्नाचा आग्रह करुन या तरुणीने त्या तरुणावर चाकूने सपासप वार केले. तसेच सर्वांना ठार मारण्याची धमकी दिली. यावेळी काही नागरिक तरुणीला समजवायला गेले असता त्या तरुणीने त्यांच्यावरही हल्ला चढवला.
दरम्यान, ही माहिती कळताच पोलीस गाडी तेथे पोहोचली. परंतु, गाडीचा सायरनचा आवाज ऐकताच तरुणीने धूम ठोकली. या प्रकरणी तरुणाच्या बहिणीच्या फिर्यादीवरुन संबंधित तरुणीविरुद्ध वेगवेगळ्या कलमान्वये गुन्हा दाखल करण्यात आला आहे. तर तरुणावर रुग्णालयात उपचार सुरु आहेत. पोलिसांनी त्या तरुणीस ताब्यात घेतले असून या घटनेचा तपास पो.नि. राहुल खताळ यांच्या मार्गदर्शनात उपनिरीक्षक राहुल मोरे हे करीत आहेत.
