चाळीसगाव (प्रतिनिधी) – ५० लाख रुपयांच्या अपघाती विम्याच्या रकमेचा लाभ मिळविण्याकरीता दोन वर्षांपुर्वी मयत झालेल्या व्यक्तीच्या अपघाताचा बनाव रचल्याचा प्रकार उघडकीस आला आहे. याप्रकरणी चाळीसगाव ग्रामीण रुग्णालयातील वैद्यकीय अधिकाऱ्यासह चार पोलीस कर्मचाऱ्यांसह दावा दाखल करणाऱ्यां अशा सात जणांविरुद्ध मेहुणबारे पोलिसात गुन्हा दाखल करुन त्यांना अटक करण्यात आली आहे.
मालेगाव येथील राजेंद्र शालिंदर जाधव यांच्या कथित अपघाती मृत्यूबाबत श्रीराम जनरल इन्शुरन्स कंपनी लिमिटेडकडे ५० लाख रुपयांच्या पर्सनल एक्सीडेंट विम्याचा दावा सादर करण्यात आला होता. हा दावा अरुणा राजेंद्र जाधव यांनी केला होता. या दाव्यात दि. १९ एप्रिल २०२५ रोजी रात्री साडेनऊ वाजता दहिवद फाटा येथे मोटारसायकलला चारचाकी वाहनाची धडक बसून राजेंद्र जाधव गंभीर जखमी झाले आणि त्यांचा चाळीसगाव ग्रामीण रुग्णालयात उपचारादरम्यान मृत्यू झाल्याचे नमूद करण्यात आले होते. या संदर्भात मेहुनबारे पोलीस ठाण्यात गुन्हा देखील दाखल करण्यात आला होता. संबंधित विमा कंपनीने या दाव्याची सखोलचौकशी करण्यासाठी खासगी तपास यंत्रणेला नेमले. चौकशीदरम्यान अनेक गंभीर विसंगती आढळून आल्या.
अनेक विमा कंपनीच्या नावाने घेतल्या पॉलीसी
याशिवाय ग्रामपंचायतीच्या मृत्यू नोंदणी रजिस्टरमध्ये या
मृत्यूची नोंद नसल्याचे माहित अधिकारातून स्पष्ट झाले. मृताच्य विविध कागदपत्रांमध्येही वेगवेगळ् पत्ते आढळून आले. तसेच मृताच्या नावावर इतर अनेक विम कंपन्यांकडूनही विमा पॉलिसी घेण्यात आल्याची बाब समोर आली.
दोन वर्षांपुर्वी झाला होता आजारपणामुळे मृत्यू
खासगी तपास यंत्रणेने केलेल्या चौकशीत राजेंद्र जाधव यांचा प्रत्यक्ष मृत्यू दि. २३ फेब्रुवारी २०२४ रोजी आजारामुळे झाला होता. ते दीर्घकाळ मद्यपानामुळे आजारी होते. तपास अधिकाऱ्यांनी मृताच्या घरी भेट दिली असता घरातील भितीवर लावलेल्या छायाचित्रावर मृत्यूची तारीख २३/२/२०२४ अशी नमूद असल्याचे आढळले. त्यामुळे १९ एप्रिल २०२५ रोजी अपघातात मृत्यू झाल्याची कथा बनावट असल्याचे स्पष्ट झाले.
चार पोलिसांसह डॉक्टरचा सहभाग
या सर्व प्रकरणात अरुणा राजेंद्र जाधव, तक्रारदार संभाजी शिवाजी पाटील, महिंद्रा थार वाहनाचे चालक-मालक यांच्यासह चाळीसगाव ग्रामीण रुग्णालयाचे तत्कालीन वैद्यकीय अधिकारी डॉ. मंदार करंबळेकर आणि मेहुनबारे पोलीस ठाण्यातील पोलीस कर्मचारी महेंद्र पाटील, रवींद्र एकनाथ बत्तीशे, सचिन अशोक निकम व सुनील अशोक निकम यांच्यावर बनावट कागदपत्रे तयार करून फसवणूक केल्याप्रकरणी गुन्हा दाखल करण्यात आला असून त्यांना अटक करण्यात आली आहे. पुढील तपास पाचोरा उपविभागीय पोलीस अधिकारी बापू रोहम करीत आहेत.
