धरणगाव (प्रतिनिधी) आम्ही पोलीस आहोत अशी बतावणी करत वृद्धाच्या हातातील सोन्याची अंगठी काढून ३० हजारात फसवणूक केल्याची धक्कादायक घटना उड्डाणपुलाजवळ घडली आहे. या प्रकरणी दोन अज्ञात भामट्यांविरुद्ध गुन्हा दाखल करण्यात आला आहे.
या संदर्भात छगन सखाराम खैरनार (वय 73,रा. कमलनगर, एरंडोल, धरणगाव) यांनी फिर्याद दिली आहे. त्यानुसार खैरनार हे दि. 17 जानेवारी 10 वाजेच्या सुमारास घराचे लाईटबील भरण्यासाठी स्कुटीवरून शहरातील बालाजी पतपेढी येथे आले होते. लाईटबील भरणे झाल्यानंतर 11 वाजेच्या सुमारास स्कुटीने घरी परत जात असतांना शहरातील किकाभाई बोहरा यांच्या बंगल्यासमोर दोन अनोखी मोटारसायकलस्वार यांनी त्यांची दुचाकी थांबवली. तसेच आम्ही पोलीस आहोत, अशी बतावणी केली. भामट्यांनी खैरनार यांना विचारपुस केली की, तुमच्याकडे गांजा आहे काय?. यानंतर दोघं भामट्यांनी श्री. खैरनार यांच्या दुचाकीची डीक्की उघडण्यास सांगितले. यानंतर दोघं भामट्यांनी खैरनार यांच्या हातातील रुमाल व हातातील अंगठी खिशात घाला, असे सांगीतले. घाबरून खैरनार यांनी हातातील अंगठी काढून खिशात घालण्याचा प्रयत्न केला. याच दरम्यान, भामट्यांनी हातचलाखीने अंगठी लंपास केली. यानंतर खैरनार यांच्या लक्षात येईपर्यंत दोघे मोटर सायकलने निघून गेलेले होते. खैरनार यांनी दोघांचा पाठलाग केला. परंतू ते मिळून आले नाहीत. या प्रकरणी गुन्हा दाखल करण्यात आला असून पुढील तपास धरणगाव पोलिस करत आहेत. दरम्यान, संपूर्ण घटनाक्रम सीसीटीव्ही कॅमेऱ्यात कैद झाला आहे.
