जळगाव (प्रतिनिधी) अल्पवयीन मुलीवर अत्याचाराच्या गुन्ह्यात न्यायालयीन कोठडीत असलेल्या एका आरोपीचा मंगळवारी उपचारादरम्यान, मृत्यू झाला होता. त्याच्या मृतदेहावर आज न्यायाधीशांच्या उपस्थित ‘इनकॅमेरा’ शवविच्छेदन करण्यात आले. रघुनाथ लोटू इंगळे (५९,रा. महावीर चौक, सावदा) असे मयताचे नाव आहे.
अल्पवयीन मुलीवर अत्याचार केल्याप्रकरणी २०१७ मध्ये रघुनाथ इंगळे याच्याविरुध्द सावदा पोलीस ठाण्यात गुन्हा दाखल झाला होता. तेव्हापासून तो कारागृहात न्यायालयीन कोठडीत होता. प्रकृती खालावल्याने कारागृह प्रशासनाने त्याला १ जानेवारी रोजी डॉ.उल्हास पाटील वैद्यकिय महाविद्यालय व रुग्णालयात दाखल केले होते. उपचार सुरु असताना मंगळवारी दुपारी चार वाजता त्याचा मृत्यू झाला. त्यानंतर आज सकाळी जिल्हा रुग्णालयात बुधवारी न्यायाधीश जी.जी.कांबळे यांच्या उपस्थित इनकॅमेरा शवविच्छेदन करण्यात आले. न्यायाधीशांनी ३० मिनिटे मृतदेहाची पाहणी केली. दरम्यान, मणक्याच्या आजारामुळे मृत्यू झाल्याचा दावा कारागृह प्रशासनाने केलेला आहे. मृत्यूविषयी नातेवाईकांनी कोणताही तक्रार केल्यास सीआयडीमार्फत चौकशी होईल. दरम्यान, शवविच्छेदन झाल्यानंतर इंगळे याचा मृतदेह नातेवाईकांच्या ताब्यात देण्यात आला. यावेळी जिल्हा पेठ पोलीस ठाण्याचे सहायक पोलीस निरीक्षक महेंद्र वाघमारे, उपनिरीक्षक राजेंद्र साळुंखे, प्रवीण भोसले, प्रमोद महाजन, कारागृहाचे अधिकारी जितेंद्र माळी व इतर कर्मचारी उपस्थित होते.
