जळगाव (प्रतिनिधी) एमपीडीए कायद्याखाली दोघा गुन्हेगारांवर स्थानबद्धतेची कारवाई करण्यात आली आहे. जळगाव शहरातील रामानंद नगर पोलिस स्टेशन हद्दीतील विश्वास अरुण गारुंगे आणि पारोळा पोलिस स्टेशन हद्दीतील समाधान लोटन चौधरी, अशी दोघा गुन्हेगारांची नावे आहेत. दरम्यान, जळगाव जिल्हा पोलीस दलाच्या टार्गेटवर आणखी काही गुन्हेगार असल्याची माहिती कळते.
जळगाव शहरातील समता नगर भागात राहणारा विश्वास अरुण गारुंगे याच्याविरुद्ध रामानंद नगर पोलिस स्टेशनला एकूण १८ गुन्हे दाखल आहेत. तसेच त्याच्याविरुद्ध चारवेळा प्रतिबंधात्मक कारवाया देखील करण्यात आलेल्या होत्या. त्यानुसार विश्वास गारुंगे याच्याविरुद्ध स्थानबद्धतेची कारवाई करण्यात आली. रामानंदनगर पो.स्टे. पोलीस निरीक्षक शिल्पा पाटील, पोहेकॉ संजय सपकाळे, सुशिल चौधरी, राजेश चव्हाण, विजय खैरे, पो.ना.रेवानंद साळुंखे, विनोद सुर्यवंशी, पोकॉ रविंद्र चौधरी, उमेश पवार अशांनी त्यास दि. ३१ ऑगस्ट रोजी रोजी ताब्यात घेवून नागपूर मध्यवर्ती कारागृह जि. नागपूर येथे दाखल केले.
याचपद्धतीने पारोळा येथील राजीव गांधी नगर भागातील गुन्हेगार समाधान चौधरी याच्याविरुद्ध एकूण १४ गुन्हे दाखल आहेत. याशिवाय त्याच्याविरुद्ध एक अदखलपात्र गुन्हा दाखल असून त्याच्याविरुद्ध दोनवेळा प्रतिबंधात्मक कारवाया करण्यात आलेल्या आहेत. पारोळा पोलीस निरीक्षक सुनील पवार, पोउनि.राजु जाधव, पोहेकॉ प्रविण पारधी अशांनी समाधान चौधरीला ताब्यात घेत आज कोल्हापूर मध्यवर्ती कारागृह जि. कोल्हापूर येथे दाखल केले.
रामानंद नगर पोलिस स्टेशनच्या पो.नि. शिल्पा पाटील आणि पारोळा पोलिस स्टेशनचे पो.नि. सुनील पवार यांनी अनुक्रमे दोघा गुन्हेगारांविरुद्ध आपल्या वरिष्ठांच्या मार्गदर्शनाखाली प्रस्ताव तयार केला होता. पोलिस अधीक्षक एम. राजकुमार यांच्या मार्गदर्शनाखाली स्थानिक गुन्हे शाखेचे पो.नि. किसनराव नजनपाटील व त्यांच्या सहका-यांनी या प्रस्तावाचा पाठपुरावा करत तो प्रस्ताव जिल्हाधिकारी आयुष प्रसाद यांच्याकडे पाठवला होता. त्यानुसार जिल्हाधिकाऱ्यांनी स्थानबद्धतेच्या कारवाईचे आदेश दिले. दरम्यान, आजपर्यंत जळगाव जिल्ह्यात 32 गुन्हेगारांविरुद्ध एमपीडीए कायद्याखाली कारवाया करण्यात आलेल्या आहेत.
वरील दोन्ही गुन्हेगारांविरुद्ध एमपीडीए प्रस्ताव पोलीस अधीक्षक एम. राज कुमार, अपर पोलीस अधीक्षक चंद्रकांत गवळी, चाळीसगाव अपर पोलीस अधीक्षक रमेश चोपडे, जळगाव उपविभागीय पोलीस अधिकारी संदिप गावीत, अमळनेर उपविभागीय पोलीस अधिकारी सुनिल नंदवालकर, यांच्या मार्गदर्शनाखाली तयार करण्यात आला होता. तर स्थानिक गुन्हे शाखेचे वरिष्ठ पोलीस निरीक्षक किसन नजनपाटील यांच्या पथकातील सफौ / युनूस शेख इब्राहिम, पोहेकॉ / सुनिल पंडीत दामोदरे, पोहेकॉ / जयंत भानुदास चौधरी, पोकॉ/ ईश्वर पंडीत पाटील अशांनी याबाबतचे काम पाहिले.
