चंद्रपूर (वृत्तसंस्था) सत्ता मिळवण्यासाठी विरोधातील उमेदवाराच्या घरी हळद-कुंकू लावलेले काळे धागे आणि इतर काही वस्तू ठेवल्याचा खळबळजनक प्रकार जिल्ह्यात उघडकीस आला आहे. या प्रकरणी चार जणांविरुद्ध गुन्हा दाखल झाला आहे.
यांच्याविरुद्ध दाखल झाला गुन्हा दाखल !
राजुरा येथील बापूजी पाटील मामुलकर प्रतिष्ठानच्या नुकत्याच झालेल्या निवडणूकीपूर्वी जादूटोण्याचा प्रकार समोर आला होता. या प्रकरणी राजुरा पोलिस स्टेशनमध्ये माजी जिल्हा परिषद सदस्य मेघा नलगे, प्रा. मयूरी नलगे, शिक्षिका शिल्पा भुते आणि अभिजित भुते यांच्यावर अघोरी प्रथा व जादूटोणा प्रतिबंध कायद्याअन्वये गुन्हा दाखल करण्यात आला आहे.
नेमकं काय आहे प्रकरण !
बापूजी पाटील मामुलकर प्रतिष्ठान या शिक्षण संस्थेची निवडणूक नुकतीच पार पडली. याच निवडणुकीपूर्वी एका गटाला सत्तेची चाबी हवी होती. पण त्यांच्याकडे पुरेसे पाठबळ नसल्याने एका संचालकांने ‘वशीकरण’ करण्याकरिता करणी व जादूटोण्याचा खेळ खेळल्याचा आरोप आहे. यासाठी एका महिला संचालकांसह अन्य तिघांनी अविनाश जाधव, डॉ. संभाजी वारकड, अॅड. अरुण धोटे, माजी आमदार सुदर्शन निमकर, बी. यु. बोर्डेवार व येगीनवार यांच्या घरी हळद, कुंकू लावलेल्या संशयास्पद वस्तू सोफ्याखाली टाकण्यात आल्या.
सीसीटीव्ही फुटेजमुळे घटना उघड !
कधीही न येणाऱ्या महिला घरी आल्याने संचालकाचा संशय बळावला व त्यांनी सीसीटीव्ही फुटेज तपासून पाहिले असता त्यांचे पितळ उघडे पडले. तीन महिलांसह एका पुरुषानी हा सगळा कारभार केल्याचे लक्षात आले. मुळात निवडणुकीपूर्वी या घटना घडल्याचे समोर आल्याने यात सत्तेचे गणित असल्याची चर्चा आहे. त्या गटाकडे पुरेसे संख्याबळ नसल्याने जादुटोण्याच्या माध्यमातून इतर संचालकांचे वशीकरण करण्याचा प्रयत्न या माध्यमातून झाल्याची चर्चा आहे.
सीसीटीव्ही फुटेज, ऑडीओ रेकॉर्डिंग व सापडलेल्या वस्तू पोलिसात जमा !
करणी व जादुटोण्याचा प्रकार समोर येताच संचालकांमध्ये खळबळ उडाली. या प्रकरणी सहाही संचालकांनी पोलिसात तक्रार दाखल केली. त्यांच्या तक्रारीवरून संचालक मेघा नलगे, शिल्पा भुते, मयुरी नलगे व अभी भुते यांच्याविरोधात महाराष्ट्र नरबळी आणि इतर अमानुष, अनिष्ट व अघोरी प्रथा व जादूटोणा प्रतिबंध करण्याबाबत व त्यांचे समूळ उच्चाटन करण्या संदर्भातील अधिनियम २०१३ च्या कलम ३ (१) व ३ (२) अन्वये गुन्हा दाखल करण्यात आला आहे. तर पोलिस तक्रारीत सीसीटीव्ही फुटेज, ऑडीओ रेकॉर्डिंग व सापडलेल्या वस्तू राजुरा पोलिस ठाण्यात जमा केल्या. याबाबतचे वृत्त विविध स्थानिक माध्यमांनी दिले आहे.
