जळगाव (प्रतिनिधी) शहरातील गोलाणी मार्केटच्या छतावरून पडल्याने तरूणाचा जागीच मृत्यू झाल्याची घटना उघडकीस आली आहे. याप्रकरणी शहर पोलीसात (Police) अकस्तात मृत्यूची नोंद करण्यात आली आहे. मुकेश रमेश राजपूत (वय-३२) रा. नाथवाडा असे मयत झालेल्या तरूणाचे नाव आहे.
मुकेश राजपूत जळगावात कुटुंबियांसह वास्तव्याला आहे. मुकेश हा महापालिकेच्‍या सतरा मजली इमारतीजवळ असलेल्‍या खाऊगल्लीत चायनिज दुकानावर कामाला होता. सोमवारी (९ मे) सायंकाळी कामावर आला होता. रात्री काम आटोपून घरी निघून गेला. दरम्यान रात्री १२.३० वाजता तो गोलाणी मार्केटच्या छतावरून खाली पडल्याचे त्याचा जागीच मृत्यू झाला.
कामावरून घरी गेलेला मुकेश गोलाणी मार्केटमध्ये रात्री उशीरा काय करत होता याची माहिती अद्याप मिळालेली नाही. मृतदेह जिल्हा शासकीय वैद्यकीय महाविद्यालयात दाखल करण्यात आला. यानंतर आज (१० मे) सकाळी शवविच्छेदन करून मृतदेह नातेवाईकांच्या ताब्यात देण्यात आला. याबाबत शहर पोलीस ठाण्यात अकस्मात मृत्यूची नोंद करण्यात आली आहे.
