अमळनेर (प्रतिनिधी) अवैध वाळू वाहतुक करणाऱ्या ट्रॅक्टरवर कारवाई करणाऱ्या तलाठ्याला ट्रॅक्टर खाली चिरडून ठार मारण्याचा प्रयत्न केल्याची घटना अमळनेर तालुक्यातील पांतोडा शिवारात रविवारी सकाळी घडली. वाळूमाफियांनी पथकातील इतरांना मारहाण करीत गंभीर जखमी केले. याप्रकरणी अमळनेर पोलीस ठाण्यात त्यांच्याविरुद्ध गुन्हा दाखल करण्यात आला आहे.
नेमकं काय घडलं !
अमळनेर तालुक्यातील रणाईचे येथील तलाठी संदीप रामदास शिंदे हे तलाठी प्रकाश महाजन, मधुकर पाटील व मंडळ अधिकारी योगेश पाटील यांच्यासोबत अमळनेर तालुक्यातील अवैध वाळू वाहतुक रोखण्यासाठी पथक तयार केले होते. रविवारी पहाटे पाच वाजेच्या सुमारास हे पथक खासगी वाहनाने अमळनेर तालुक्यातील पातोंडा व दहिवद शिवारात गस्त घालीत होते. यावेळी पथकाला नांद्री गावाकडून दहिवद गावाकडे वाळूने भरलेले ट्रॅक्टर येतांना दिसले. पथकाने ट्रॅक्टरवर कारवाईसाठी थांबवले असता, चालक ट्रॅक्टर सोडून पसार झाला.
ट्रॅक्टरने तलाठी यांना चिरडण्याचा प्रयत्न !
पथकातील तलाठी हे ट्रॅक्टवर चढलेले असतांना (एमएच १९ डीएम ०५२८) व (एमएच २१ बी २९९२) क्रमांकाच्या दुचाकीवरुन भूषण उर्फ सोनू राजेंद्र देवरे रा. पातोंडा व ट्रॅक्टवरील चालक योगेश पाटील तर दुसऱ्या दुचाकीवर दोन अज्ञात इसम आले. दुचाकीवरुन आलेल्या वाळूमाफियांनी ट्रॅक्टवर चढलेल्या तलाठी यांना खाली ओढले आणि त्यांना लाथा बुक्क्यांनी बेदम मारहाण केली. त्यानंतर तलाठी संदीप पाटील यांना खाली आडवे पाडून मारहाण करीत असतांना आज याला जीवंत सोडायचे नाही, असे म्हणून योगेश पाटील याने ट्रॅक्टरने तलाठी यांना चिरडण्याचा प्रयत्न केला.
प्लास्टीच्या काठ्यांनी केली मारहाण !
ट्रॅक्टरने चिरडण्याचा प्रयत्न करीत असतांना पथकातील कर्मचाऱ्यांनी त्यांना वेळीच चाकापासून बाहेर ओढल्यामुळे ते बालंबाल बचावले. त्यानंतर भूषण राजेंद्र देवरे रा. पातोंडा यांच्यासोबतच्यांनी मोटार सायकलला लावलेल्या प्लास्टीकच्या लाठ्या काठ्यांनी मारहाण केली. यामध्ये पथकातील तलाठी प्रकाश महाजन यांच्यासह संदीप पाटील हे देखील गंभीर जखमी झाले.
व्हीडीओ काढणाऱ्यांना धमकी !
दिली जीवेठार मारण्याची धमकी ही संपूर्ण घटना योगेश पाटील यांनी मोबाईलमध्ये कैद करीत असतांना त्यांना देखील जीवेठार मारण्याची धमकी दिली. दरम्यान पथकाने ट्रॅक्टरसह दोन्ही दुचाकी जप्त केल्या असून संशयित योगेश संतोष पाटील रा. नांद्री ता. अमळनेर, भूषण उर्फ सोनू राजेंद्र देवरे रा. पातोंडा यांच्यासह दोन अनोळखी इसमांविरुद्ध शासकीय कामात अडथळा आणल्याप्रकरणी गुन्हा दाखल करण्यात आला आहे.
