चाळीसगाव (प्रतिनिधी) चाळीसगाव ग्रामीण पोलिस ठाण्यातील कर्मचारी दीपक देविदास ठाकूर याला आज धुळे एसीबीच्या पथकाने पोलिस ठाण्यातच ३ हजारांची लाच स्वीकारताना रंगेहात अटक केल्यामुळे प्रचंड खळबळ उडाली आहे. विवाहितेच्या छळ प्रकरणी दाखल गुन्ह्यात आरोपींवर कारवाई करण्यासाठी ठाकूर याने ही लाच मागितली असल्याची प्राथमिक माहिती समोर येत आहे.
चाळीसगाव तालुक्यातील एका गावात राहणाऱ्या विवाहितेचा विवाह गेल्या दहा वर्षांपूर्वी झाला होता. त्यानंतर वारंवार पतीसह सासरच्या मंडळींकडून सदर विवाहितेचा शारीरिक व मानसिक छळ करण्यात येत असे. त्यावर सदर महिला हि गेल्या वर्षभरापासून आपल्या माहिरी रहायला होती. दरम्यान पिडितेच्या भावाच्या फिर्यादीवरून चाळीसगाव ग्रामीण पोलीस स्थानकात भादवी कलम- ४९८ (अ) नुसार गुन्हा दाखल करण्यात आला होता. आणि याचा तपास पोहेकॉ दिपक देविदास ठाकूर हे करीत होते. मात्र पिडितेच्या भावाने ठाकूर यांना संबंधित आरोपींवर कारवाई केव्हा कराल? अशी विचारणा केली असता त्यांनी पाच हजार रुपयांची मागणी केली. त्यावर सदर तक्रारदारांनी लाचलुचपत प्रतिबंधक विभाग, धुळे यांच्याकडे तक्रार केली. आणि त्यानुसार लाचलुचपत विभागाने आज सापळा रचून ठाकूर याला ३ हजार रुपयांची लाच घेताना रंगेहाथ पकडत अटक केली. याप्रकरणी पोलीस ठाण्यात गुन्हा नोंदविण्याचे काम सुरू आहे.
