बोदवड (प्रतिनिधी) येथील महाकाल फौंडेशनचे अध्यक्ष अनिल गंगतीरे आणि राष्ट्रवादी काँग्रेसच्या पॅनलमधून निवडून आलेले कृषी उत्पन्न बाजार समिती संचालक गोपाळ माळी यांनी आपल्या सहकाऱ्यांसह हैदराबाद येथे तेलंगणाचे मुख्यमंत्री के. चंद्रशेखर राव यांच्याहस्ते भारत राष्ट्र समिती या पक्षात प्रवेश केला.
बोदवड तालुक्यात तेलंगणाचे मुख्यमंत्री केसीआर यांच्या भारत राष्ट्र समिती पक्षाचा प्रवेश झाला असून राष्ट्रवादीच्या पँनलमधून हमाल मापाडी मतदारसंघातून निवडून आलेले संचालक गोपाल माळी यांनी महाकाल फाऊंडेशनचे संस्थापक अध्यक्ष अनिल गंगतीरे यांच्यासोबत हैदराबाद येथे मुख्यमंत्री केसीआर यांच्या हस्ते पक्षात प्रवेश केला.
महाराष्ट्रात भारत राष्ट्र समिती पक्षाच्या विस्तारासाठी सर्वोतोपरी प्रयत्न करीत आहे. ठिकठिकाणच्या सक्रिय कार्यकर्त्यांचा शोध घेऊन त्यांना पक्षात प्रवेशासाठी आमंत्रित केले जात आहे. बोदवड तालुक्यातील महाकाल फाऊंडेशनच्या माध्यमातून विविध उपक्रम राबविणारे तसेच बोदवड परिसर जलसिंचन योजनेस लवकर निधी मिळावा म्हणून बोदवड ते मुंबई कार्यकर्त्यांसह पदयात्रा काढल्याने चर्चेत असलेले अनिल गंगतिरे यांच्याशी भारत राष्ट्र समितीच्या पक्षाकडून संपर्क साधण्यात आला आणि तेलंगणा मॉडेल कसे राबवले जाते?, हे पाहण्यासाठी हैदराबाद येथे आमंत्रित केले होते. त्यानुसार अनिल गंगतिरे यांच्या सोबत फाऊंडेशन मध्ये सक्रिय असलेले कृषी उत्पन्न बाजार समिती संचालक गोपाल माळी, मराठा सेवा संघप्रणित वीर भगतसिंग विद्यार्थी परिषदेचे माजी तालुका अध्यक्ष तुषार उगले, जगदीश हजारी, कपिल मराठे यांच्या सह 13 आँगस्ट रोजी तेलंगणा राजधानी हेदराबाद येथे आमंत्रित केल्यानुसार भेट देण्यासाठी गेले. त्यावेळी दोन दिवस पक्षाच्या वरिष्ठ पदाधिकाऱ्यांकडून तेलंगणा मॉडेलसंबधी माहीती देत काही उपक्रम दाखविले गेले.
तसेच पक्षाचे शेती उद्योग शिक्षण आरोग्य संबधी कामाची माहिती व ध्येय धोरणे याचा परिचय करून दिला. एवढेच नव्हे तर, पक्षात काम करण्यासाठी इच्छूक असल्यास तुमचे स्वागत आहे असे म्हणत आमंत्रित केले. पक्ष कामाच्या बद्दल माहीती घेतल्यानंतर पक्षाच्या सहाय्याने तालुक्यात काम करण्याची संधी लक्षात घेत यासर्वांनी पक्षात प्रवेश करण्याचा निर्णय घेतला.
या सर्वाचा तेलंगणा मुख्यमंत्री के.चंद्रशेखर राव यांनी पक्षाची ओळख असलेले गुलाबी रंगाचा रूमाल देऊन पक्षात स्वागत केले. तसेच पक्ष विस्तारासाठी पुढील सुचना दिल्या. त्यानुसार आता तालुक्यात पक्ष वाढीचे नियोजन करण्यात येईल, असे अनिल गंगतिरे यांनी सांगितले.