मुंबई (वृत्तसंस्था) महाराष्ट्र विधानसभा अध्यक्षपदासाठी भाजपचे राहुल नार्वेकर विरुद्ध शिवसेनेचे राजन साळवी अशी थेट लढत होणार आहे. दरम्यान या विधानसभा निवडणुकीसाठी शिवसेना आमदारांना दोन वेगवेगळे व्हीप बजावण्यात आलेत आहेत.
विधानसभा अध्यक्षपद निवडणूक उद्या होणार आहे. शिवसेनेने देखील आपला उमेदवार उभा करून निवडणुकीची चुरस वाढवली आहे. शिवसेनेचे राजन साळवी यांना निवडुन आणण्यासाठी सर्व आमदारांना व्हिप बजावला आहे. यात शिंदे गटातील आमदारांचा देखील समावेश आहे. दुसरीकडे एकनाथ शिंदे गटाने आम्हीच खरी शिवसेना असल्याचा दावा करत महाडचे आमदार भरत गोगावले यांची प्रतोदपदी नियुक्ती केली आहे. तसेच एकनाथ शिंदेच्या गटाने देखील या अगोदरच व्हीप बजावला आहे.
शिवसेनेच्या पक्षादेशात काय लिहिलंय?
महाराष्ट्र विधानसभेचे विशेष अधिवेशन रविवार, दिनांक 3 जुलै 2022 आणि सोमवार 4 जुलै 2022 रोजी विधानभवन, मुंबई येथे घेण्यात येणार आहे. रविवारी 3 जुलै रोजी महाराष्ट्र विधानसभा सभागृहात अध्यक्षांची निवड होणार आहे. या पदासाठी शिवसेना पक्षातर्फे राजन साळवी यांनी अर्ज भरला आहे. या निवडणुकीत शिवसेनेच्या विधानसभा सदस्यांनी मतदानात सहभागी व्हायचे असून साळवी यांना मतदान करावे, असा पक्षादेश आहे. दरम्यान महाविकास आघाडीने विधनासभा निवडणुकीसंदर्भात अनेक प्रश्न उपस्थित केले आहे. महाविकास आघाडीचे नेत्यांचे म्हणणे आहे की, सुप्रीम कोर्टात हे प्रकरण असताना विधानसभा निवडणुका कशा काय घेण्यात येत आहे. या संदर्भात आम्ही पत्र लिहित तक्रार देखील केली होती.
