जळगाव (प्रतिनिधी) अट्टल दुचाकी चोरट्याला एमआयडीसी पोलिसांनी अटक नुकतीच अटक केली आहे. पोलिसांनी त्याच्याकडून चोरीच्या चार दुचाकी जप्त केल्या आहेत. प्रशांत उर्फ चोर बाप्या पंडित साबळे (सुप्रीम कॉलनी, जळगाव) असे अटकेतील संशयित आरोपीचे नाव आहे.
दुर्गा देवी विसर्जनाच्या दिवशी मेहरुण तलाव भागातून एक मोटार सायकल चोरी झाली होती. याप्रकरणी दाखल चोरीच्या गुन्ह्याचा तपास एमआयडीसी पोलिस स्टेशनचे गुन्हे शोध पथक करत होते. तपासादरम्यान रेकॉर्डवरील गुन्हेगार प्रशांत उर्फ चोर बाप्या हा चोरीच्या मोटार सायकली वापरत असल्याची माहिती पोलीस निरीक्षक जयपाल हिरे यांना मिळाली. त्या माहितीच्या आधारे त्यांनी अधिक तपासकामी दोन वेगवेगळे पथक त्याच्या मागावर पाठवले.
या पथकाने त्याचा शोध घेत पाठलाग करत त्याला ताब्यात घेतले. त्याच्या ताब्यातील मोटार सायकलीच्या कागदपत्रांची त्याला विचारणा करण्यात आली. ताब्यातील मोटार सायकल आपण नंदुरबार येथून चोरी केल्याचे त्याने कबुल केले. संशयित आरोपीला न्यायालयात हजर केले असता त्याला पोलिस कोठडी सुनावण्यात आली आहे.
