नंदुरबार (प्रतिनिधी) जिल्ह्यात धडगाव पोलीस स्थानकात पोलिसाला मारहाण करण्यात आल्याचा प्रकार समोर आला आहे. याप्रकरणी तिघांविरुद्ध शासकीय कामात अडथळा आणल्याप्रकरणी तसेच मारहाण केल्याप्रकरणी गुन्हा दाखल करण्यात आला आहे. अनिल सुकलाल पावरा, लकड्या सुकलाल पावरा आणि सुकलाल वल्या पावरा अशी गुन्हा दाखल झालेल्यांचा नावं आहेत.
नेमकं काय आहे प्रकरण ?
तिघेही धडगाव तालुक्यातील वलवाड येथील रहिवाशी आहेत. पावरा यांच्या मालकीचा पीकअप चोरीला गेला आहे. यानंतर त्याचा तपास पोलीस करत नाहीत, असा राग मनात धरुन पावरा कुटुंबातील सदस्य धडगाव पोलीस ठाण्यात गेले. तेथे त्यांनी शिवीगाळ करुन पोलीस कर्मचारी शशिकांत रमेश वसईकर यांची कॉलर पकडली. इतकेच नव्हे तर त्यांना जमिनीवर पाडून मारहाण केली.
संतापाच्या भरात पावरा कुटुंबीयांनी पोलीस कर्मचाऱ्याला मारहाण केल्यानंतर दुसऱ्या टेबलवरील महिला पोलीस कर्मचारी सविता पाचुर्णे यांच्याकडील कागदपत्रे फेकून दिली. दरम्यान, या प्रकारानंतर पोलीस कर्मचारी शशिकांत वसईकर यांनी फिर्याद दिली. यानंतर तिघांविरुद्ध धडगाव पोलीस ठाण्यात गुन्हा दाखल करण्यात आला आहे. या संपूर्ण तपास पोलीस निरीक्षक जी. आर. औताडे करत आहेत.
