जळगाव (प्रतिनिधी) बीएचआर घोटाळ्यातील फरार असलेल्या मुख्य संशयित सुनील झंवर याचा मुलगा संशयित सुरज झंवर यांच्या विरोधात मंगळवारी पुणे विशेष न्यायालयात पुणे आर्थिक गुन्हे शाखेने दोषारोपपत्र दाखल केले आहे.
सुनील झंवर यांची साई मार्केटींग ऍण्ड ट्रेडींग नावाने कंपनी आहे. या कंपनीत सूरज झंवर हा संचालक असून तो कंपनीचा भागीदार आहे. या कंपनीच्या नावाने निविदा भरुन बीएचआरच्या कोट्यवधींच्या मालमत्ता कवडीमोल भावात खरेदी केल्याचे आर्थिक गुन्हे शाखेने केलेल्या तपासात निष्पन्न झाले होते. यानंतर सूरज झंवर यास २२ जानेवारी रोजी जळगावातून जय नगर येथील राहत्या घरुन अटक केली होती. यानंतर त्याला २ फेब्रुवारीपर्यंत ११ दिवसांची पोलीस कोठडी सुनावण्यात आली होती. सद्यस्थितीत सुरज झंवर हा न्यायालयीन कोठडीत पुणे येथील कारागृहात आहे. दरम्यान यापूर्वी २३ फेब्रुवारी रोजी पुणे आर्थिक गुन्हे शाखेने पुणे येथील न्यायालयात संशयित सुजीत वाणी, धरम साखला, महावीर जैन, विवेक ठाकर, कमलाकर कोळी यांच्या विरोधात २ हजार ४०० पानांचे दोषारोप पत्र दाखल केले आहे.
