जळगाव (प्रतिनिधी) बीएचआर घोटाळ्यात पुणे आर्थिक गुन्हे शाखेच्या पथकाने जळगावात छापेमारी करून दोन ट्रकभरून कागदपत्र जप्त करून नेले होते. या कागदपत्रांमधून मुख्य संशयित सुनील झंवर, अवसायक जितेंद्र कंडारे यांच्याविरुद्ध भक्कम पुरावे पोलिसांना मिळाले आहेत. त्यामुळे आता आर्थिक गुन्हे शाखेच्या पथकाने दोघांचा पुन्हा कसून शोध सुरु केला असल्याची माहिती सूत्रांनी दिली आहे.
अटकेतील पाचही आरोपींची न्यायालयीन कोठडीत रवानगी झाल्यानंतर मुख्य संशयित सुनील झंवर आणि अवसायक जितेंद्र कंडारेसह इतर आरोपींचा पथके शोध घेत आहेत. दुसरीकडे एक पथक जप्त केलेल्या कागद पत्रांची छाननी करून महत्वपूर्ण पुरावे गोळा करायला मागील काही दिवसांपासून सुरुवात केली होती. भाईचंद हिराचंद रायसोनी मल्टीस्टेट सहकारी पतसंस्थेचा अव्यवसाय जितेंद्र कंडारे, प्रकाश वाणी, कुणाल शहा, सुनील झंवर, महाविर जैन, सुजित वाणी, धरम साखला, योगेश साखला, विवेक ठाकरे, माहेश्वरी व इतरांनी एकमेकांच्या संगनमताने संस्थेत मोठ्या प्रमाणात अपहार केल्याचे पोलीस तपासात समोर आले आहे. यातील माहेश्वरी, सुनील झंवर, जितेंद्र कंडारे, प्रकाश वाणी, कुणाल शहा, योगेश साखला हे अद्याप पोलिसांच्या हाती लागलेली नाहीत. तर महाविर जैन, सुजित वाणी, धरम साखला, विवेक ठाकरे आणि कंडारेचा वाहन चालक कमलाकर कोळी असे एकूण पाच संशयितांची न्यायालयीन कोठडीत रवानगी झाली आहे.
दरम्यान, घोटाळ्यातील मुख्य संशयित सुनील झंवर आणि अवसायक जितेंद्र कंडारे यांच्यावर मागावर पोलीस आहेत. दोघांसह इतर आरोपींच्या शोधार्थ राज्यभरात ३ पथके रवाना करण्यात आली आहेत. दुसरीकडे आपण ट्रकभर कागदपत्र जप्त केली आहेत. त्या कागदपत्रांचा अभ्यास सुरु असून पुरावे गोळा करण्याचे काम पूर्ण झाल्याचे कळते. फॉरेंसिक ऑडिटमधून संशयित आरोपींविरुद्ध भक्कम पुरावे मिळाले आहेत. त्यामुळे काही दिवसांपासून थंड पडलेले आरोपींच्या अटकेचे मिशन पुन्हा जोरात सुरु झाले असून लवकरच सर्व संशयितांच्या मुसक्या पोलीस आवळतील असे बोलले जात आहे.
