भुसावळ (प्रतिनिधी) तीन वर्षीय बालकाचा नाल्यात पडून मृत्यू झाल्याची दुर्देवी घटना रविवारी रात्री आठ वाजता उघडकीस आली. ही घटना खडका रोड भागात घडली. अरसलान उर्फ बाब बिहारी असे मृत चिमुकल्याचे नाव आहे. या घटनेमुळे पालिका प्रशासनाविरोधात नागरिकांकडून संताप व्यक्त करण्यात येत आहे. सीसीटीव्ही कॅमेऱ्यामुळे या बालकाचा शोध लागला.
अरसलान उर्फ बाब बिहारी या मृत चिमुकल्याचे वडिल नसरुद्दीन हे खडका रोड येथे मुजम्मिल खान यांच्याकडे भाड्याने वास्तव्यास आहेत. वरच्या बाजूस घर आणि खाली दुकान असून रविवारी सकाळी ११ वाजता तो वडिलांसोबत आला होता. खडका रोडवरील बिलाल कांडप मशिन या दुकानाबाहेर तो खेळत होता. याच ठिकाणी ३० फूट खोल व सहा फूट रुंद नाला आहे. अरसलाम हा खेळता खेळता नाल्यामध्ये पडला.
अर्धा ते एक तास झाला तरी अरसलान कुठेच न आढळल्यामुळे त्याच्या वडिलांनी शोध घेतला. अखेर सोशल मीडियावर अरसलान हरवल्याची पोस्ट वाऱ्यासारखी पसरली. मात्र, रात्री उशिरापर्यंत ही त्याच्याविषयी माहिती मिळाली नाही. दरम्यान, माजी नगरसेवक आशिक खान यांच्या दुकानासमोरील सीसीटीव्ही कॅमेऱ्याचे फुटेज तपासले असता तर अरसलान हा खेळताना नाल्यात पडल्याचे स्पष्ट झाले. मात्र, हे फुटेज तपासण्यास उशिर झाल्यामुळे या बालकाचा नाल्यातील गाळात अडकून मृत्यू झाला होता. काही नागरिकांनी शिडी लावून ३० फुट नाल्यात उतरून रात्री साडेआठ वाजेच्या सुमारास या बालकाचा मृतदेह बाहेर काढला.
