फत्तेपूर ता. जामनेर (प्रतिनिधी) येथील भुसार मालाचे व्यापारी नाना इंगळे यांचे तीन गोदाम रेशनचे धान्य असल्याच्या संशयावरून प्रशासनाने सील केले आहेत. शनिवारी रात्री उशिरापर्यंत ही कारवाई सुरू होती. दरम्यान, या कारवाईमुळे प्रचंड खळबळ उडाली आहे.
व्यापारी इंगळे यांच्या गोद्री रस्त्यावरील घराजवळ असलेल्या गोदामात धान्य उतरवले जात होते. हे धान्य रेशनचे असल्याच्या माहितीवरून पोलिस निरीक्षक इंगळे यांनी घटनास्थळ गाठले. यानंतर तहसीलदार अरुण शेवाळे यांनी पुरवठा निरीक्षक वैराडकर व कर्मचाऱ्यांना घटनास्थळी पोहचले. या गोदामासह धामणगाव रोडवरील दोन गोदामे प्रशासनाने सील केली. त्यापूर्वी गोण्यांमधील धान्याचे नमुने घेण्यात आली आहेत.
तिन्ही गोदामात गहू, तांदूळ, तूर, मका अशा स्वरूपाचे तब्बल तीन टन धान्य आहे. हा माल शेतकऱ्यांकडून घेतल्याच्या पावत्या आपल्याकडे आहेत, अशी माहिती व्यापारी नाना इंगळे यांनी दिली. दरम्यान, याबाबत अद्याप कुठलाही गुन्हा दाखल झालेला नसून, धान्य रेशनचे आहे किंवा नाही याबाबतचा अहवाल प्राप्त झाल्यानंतर पुढील कारवाई होईल अशी माहिती पुरवठा विभागाने दिली.
