चोपडा (प्रतिनिधी) चोपड़ा ग्रामीण पोलीस स्टेशन हद्दीत लासूर ते सत्रासेन रोडवर उत्तमनगर गावाच्या अलिकडे असलेल्या घाटात सहा दरोडेखोरांनी दहशत माजवून दरोडा घालण्याच्या प्रयत्न केला. मात्र, पोलिसांनी चार दरोडेखोरांना अटक केली असून एका दरोडेखोराने पोलिसाच्या छातीत बुक्का मारून पळ काढला. याप्रकरणी चोपडा ग्रामीण पोलीस स्थानकात सहा जणांविरुद्ध गुन्हा दाखल करण्यात आला आहे.
यासंदर्भात अधिक असे की, दि. ४ जून २०२२ रोजी चोपड़ा ग्रामीण पोलीस स्टेशन हद्दीत लासूर ते सत्रासेन रोडवर उत्तमनगर गावाच्या अलिकडे असलेल्या घाटात रविंद्र वसंत खारगे, जिजाबा मल्हारी फाळके, चांदपाशा अजिज शेख, जयेश लक्ष्मण भुरूक व पळून गेलेला इसम सतनामसिंग महारसिंग जुनैजा असे धाक दाखवून दहशत माजवून दरोडा घालण्याच्या उद्देशाने पुर्वतयारीत होते त्यांच्या कब्जात प्राणघातक अग्निशस्त्र (पिस्तूल) असे घातक शस्त्र मिळून आले. यावेळी पोहेकॉ मनोज दुसाने यांनी सतनासिंग जुनैजा यास पकडण्याचा प्रयत्न केला असता त्याने अटक होवू नये या करीता दुसाने यांच्या छातीत बुक्का मारून पळ काढला. तसेच जाताना ‘तेरेमे दम है तो मेरेको पकडके दिखा’ असे सांगून शासकीय कामात अडथळा निर्माण केला. तसेच शिकलकर इसम (नाव गाव माहित नाही) याचा मो नं. ७६१०७३३२९० जो पकडलेल्या आरोपींनी सांगितले व सतनामसिंग महारसिंग जुनैजा याने रविंद्र वसंत खारगे, जिजाबा मल्हारी फाळके, चांदपाशा अजिज शेख, जयेश लक्ष्मण भुरूक यांना दरोडा टाकण्याचा उद्देशाने प्राणघातक अग्निशस्त्र (पिस्तूल) विक्री केली. तसेच सतनामसिंग महारसिंग जुनैजा याने आरोपीतांना दरोडा टाकण्यास मदत केली. याप्रकरणी पोहेकॉ मनोज अशोक दुसाने यांनी दिलेल्या फिर्यादीवरून चोपडा ग्रामीण पोलीस स्थानकात सहा जणांविरुद्ध गुन्हा दाखल करण्यात आला आहे. तसेच पुढील तपास पोलीस उपनिरीक्षक अमरसिंग वसावे हे करीत आहेत.
