मुंबई (वृत्तसंस्था) ‘स्वत: शेण खाऊन समाजाला वेठीस धरण्याचा नवा ट्रेण्ड सध्या राजकारणात आलाय. पण, संजय राठोड पूजा चव्हाणचा हत्यारा आहे, त्याच्या मुसक्या आवळायलाच हव्यात’, असा घणाघात भाजप नेत्या चित्रा वाघ यांनी केला आहे.
पुजा चव्हाण आत्महत्या प्रकरणात नाव आल्यानंतर राज्याचे वनमंत्री संजय राऊत १५ दिवसानंतर माध्यमांसमोर आले. पोहरादेवी येथे दर्शनासाठी आले असता पत्रकार परिषद घेऊन त्यांनी आपली बाजू मांडली. यावेळी त्यांनी त्यांच्यावर लावण्यात आलेल्या सर्व आरोपांना फेटाळून लावले. यानंतर भाजपकडून राठोडांचा चांगलाच समाचार घेण्यात आला आहे. ‘पूजा चव्हाणाचा हत्यारा संजय राठोड आहे आणि त्यांच्यावर सदोष मनुष्यवधाचा गुन्हा दाखल झाला पाहिजे. बंजारा समाजाला समोर करून आपला बचाव करण्यासाठी हा केविलवाना प्रयत्न आहे. बंजारा समाजाची काशी असलेल्या पोहोरादेवी अशा पवित्र ठिकाणी संजय राठोड याने आपल्या पापाची कबुली दिली आहे’ अशी टीका चित्रा वाघ यांनी केली. यावर बोलताना भाजप नेत्या चित्रा वाघ म्हणाल्या की, “या सगळ्या बलात्काऱ्यांना पाठिशी घालण्यासाठी मंत्र्यांची चढाओढ सुरु आहे. तू जास्त बोलतो की मी जास्त बोलतो. हे चित्र छत्रपती शिवाजी महाराजांच्या महाराष्ट्रासाठी अजिबातच साजेसं नाही. त्यामुळे सरकारने महिला सुरक्षेचे, महिला सक्षमीकरणाचे नारे बाजूला ठेवून अॅक्शन मोडमध्ये येण्याची गरज आहे. पूजा चव्हाणचा मारेकरी संजय राठोड यांच्या मुसक्या ताबडतोब आवळल्या पाहिजे, ही आमची मागणी आहे.”
‘संजय राठोड यांना वाचवण्यासाठी तिन्ही पक्षाच्या नेत्यांमध्ये स्पर्धा रंगली आहे. ज्या प्रकार तिन्ही पक्षाच्या नेत्यांमध्ये जी एकी दिसली आहे ती भंडारा शासकीय रुग्णालयातील जळीतकांड प्रकरणामध्ये दिसली नाही. बलात्काऱ्याला पाठीशी घालण्यासाठी हे तिन्ही पक्ष एकत्र आले आहे. त्यामुळे महिला सुरक्षेबद्दल बोलू नये, असं वाघ म्हणाले. ‘तुम्ही शेण खायचे आणि समाजाला वेठीस धरायचे, लाज तरी थोडी राहु द्या, ज्या ऑडिओ क्लिप समोर आल्या आहे. जे फोटो आले आहे, त्यावर कोणतेही स्पष्टीकरण दिले जात नाही’ असंही वाघ म्हणाल्या. पूजा चव्हाण प्रकरणी पुणे पोलिसांनी थातुरमातुर उत्तर दिले आहे. या प्रकरणात मुख्य संशयित संजय राठोड आहे. त्यांच्याबद्दल कोणतीही चौकशी केली जात नाही, त्यामुळे तो अहवाल आम्हाला मान्य नाही. आम्ही राज्यपाल आणि पोलीस महासंचालक यांच्याकडे तक्रार करणार आहोत, अशी माहितीही वाघ यांनी दिली.
पोहरादेवी गर्दी प्रकरणी तात्काळ गुन्हा दाखल करा : प्रवीण दरेकर
एकीकडे मुख्यमंत्री मास्क घाला, असं आवाहन करतात तर दुसरीकडे शेकडो समर्थकांच्या उपस्थितीत संजय राठोड गर्दी करत आहेत हे गंभीर आहे. उद्धव ठाकरे यांनी याप्रकरणी तात्काळ गुन्हा दाखल करावा आणि ठाकरी बाणा दाखवावा, अशी मागणी विरोधी पक्षनेते प्रवीण दरेकर यांनी केली आहे.
