जळगाव (प्रतिनिधी) फेसबुक खात्यावरुन एका तरुणाच्या कौटूंबिक फोटो पैकी पत्नी व आईचे फोटो डाऊनलोड करुन त्याचे अश्लील मिम्स् तयार करुन तरुणाला एका अज्ञाताने ब्लॅकमेल केल्याचा प्रकार घडला आहे. सतत पैशांच्या मागणीला कंटाळून तरुणाने माहिती अधिकार कार्यकर्त्याच्या मदतीने सायबर पोलिसांत धाव घेत अज्ञाताविरुद्ध गुन्हा दाखल केला आहे.
यासंदर्भात अधिक असे की, फेसबुकवर खाते असलेल्या एका सामान्य कुटूंबातील तरुणाने अपलोड केलेले फोटो एका भामट्याने डाऊनलोड करुन त्यात छेडखानी केली. घरंदाज कुटूंबाचे फोटो काढून ते अश्लाख्य करुन बनावट फोटो त्या तरुणाच्या मोबाइलवरील व्हाटसअॅप क्रमांकावर त्याने पाठवले. तरुणाने व्हाटसअॅप तपासले असता त्याच्या पत्नी व आईचा छेडखानी केलेला बनावट अश्लील फोटो दिसला. त्या फोटो सोबत एक हजार रुपयांची मागणी करण्यात आलेला मजकूर लिहून आला होता. त्याच मोबाईल क्रमांकावरुन त्या तरुणाला फोन आला. पलीकडून हिंदीत बोलणा-या त्या इसमाने त्याला धमकी दिली की या क्रमांकावर फोन पे च्या माध्यमातून एक हजार रुपये पाठव. अन्यथा तुझ्या पत्नी व आईचे फोटो व्हायरल केले जातील. पलीकडून फोनवर मिळालेली धमकी ऐकून सदर तरुण घाबरला. त्याच्या मोबाईलमधे फोन पे अॅप नसल्यामुळे त्याने चुलत भावाच्या मोबाईलद्वारे हजार रुपये पाठवले. त्यानंतर भेदरलेल्या त्या तरुणाने तो, फोन क्रमांक ब्लॉक केल्यावर चवताळलेल्या भामट्याने विविध चार क्रमांकावरुन सतत फोन करुन तिन हजार रुपयांची मागणी करत तरुणाला हैरान करुन सोडले. आता आपल्याकडे पैसे नाही असे सांगत त्रस्त तरुणाने पलीकडून बोलणा-याला नकार दिला. त्यानंतर पलीकडून बोलणा-याने त्या तरुणाला अश्लिल फोटो, अश्लिल मजकुर आणि एक सोबत एक लिंक पाठवली. त्या लिंक वर क्लिक केले असता त्याला त्याच्या पत्नीचे वेबसाईटवर अपलोड केलेले अश्लील फोटो दिसून आले. त्या फोटोच्या खाली एक मजकूर लिहिलेला होता.
फोटो व्हायरल करण्याची धमकी देत, संशयीताचा त्रास वाढल्याने त्रस्त तरुणाने माहिती अधिकार कार्यकर्ता दिपककुमार गुप्ता यांची भेट घेत व्यथा कथन केली. पिडीत तरुणाच्या तक्रारीवरुन सायबर पोलिस ठाण्यात अज्ञाताविरुद्ध गुन्हा दाखल करण्यात आला आहे. याप्रकरणाचा सायबर पोलिस तपास करत आहेत.
