बोदवड (प्रतिनिधी) बोदवड एज्युकेशन सोसायटीच्या कला, वाणिज्य व विज्ञान महाविद्यालयाच्या विद्यार्थी विकास कक्षाच्या माध्यमातून शैक्षणिक वर्ष २०२२-२३ करिता आर्थिक दृष्ट्या दुर्बल घटकातील एकूण १९ विद्यार्थ्यांना १०९५०० रुपयांचे आर्थिक मदतीचे धनादेश प्राचार्य प्राध्यापक अरविंद चौधरी यांच्या हस्ते वितरित करण्यात आले.
कवयित्री बहिणाबाई चौधरी उत्तर महाराष्ट्र विद्यापीठाच्या विद्यार्थी विकास विभागाच्या वतीने दरवर्षी आर्थिक दृष्ट्या दुर्बल घटकातील होतकरू विद्यार्थ्यांकरिता शिक्षणात मदत करण्यासाठी सदरची योजना राबवली जाते. या योजनेत ज्या विद्यार्थ्यांचे पालक मयत आहेत, कोरोना काळात मृत्यू पावलेले आहेत, ज्यांची शेतकरी आत्महत्या झालेली आहे किंवा जे पालक दारिद्र्यरेषेखालील कुटुंबातील असे वेगवेगळे निकष लावून विद्यार्थ्यांची निवड महाविद्यालयातील विद्यार्थी विकास कक्षाच्या माध्यमातून केली जाते व सदर विद्यार्थ्यांची या योजनेअंतर्गत विद्यापीठात शिफारस करण्यात येत असते.
तथापि, विद्यापीठाच्या विद्यार्थी विकास विभागाच्या वतीने महाविद्यालयातील एकूण १९ विद्यार्थ्यांची शिफारस मान्य करत १०९५०० रुपये कुलगुरू यांनी मंजूर केले. या रकमेचे धनादेश संबंधित विद्यार्थ्यांना प्राचार्य प्राध्यापक अरविंद चौधरी यांच्या हस्ते देण्यात आले. प्रसंगी महाविद्यालयाचे उपप्राचार्य डॉ. विनोद चौधरी, विद्यार्थी विकास अधिकारी तथा विद्यापीठाचे परीक्षा व मूल्यमापन मंडळाचे सदस्य डॉ. अजय पाटील, सहाय्यक विद्यार्थी विकास अधिकारी डॉ. मनोज निकाळजे, प्रा. अजित पाटील व विद्यार्थी उपस्थित होते.
