बोदवड (प्रतिनिधी) महसूल सप्ताहाच्या शुभारंभालाच रेशनकार्डाचे काम करून देण्यासाठी एका हजारांची लाच घेणार्‍या बोदवड तहसीलमधील उमेश बळीराम दाते (55, बोदवड) या संशयिताला कार्यालयातील दालनातच जळगाव एसीबीने मंगळवारी सायंकाळी अटक केली होती. संशयिताला बुधवारी भुसावळ सत्र न्यायालयात हजर केले असता त्यास दोन दिवसांची पोलीस कोठडी सुनावण्यात आली.
नांदगाव येथील 40 वर्षीय तक्रारदाराने पुरवठा लिपिक दाते यांच्याकडे रेशन कार्डावरील त्यांच्या आईसह मुलाचे नाव कमी करण्यासाठी तसेच नवीन रेशन कार्डासाठी विचारणा केली होती व हे काम करून देण्याच्या मोबदल्यात तक्रारदाराकडून एक हजारांची मंगळवारी लाच मागितल्याने जळगाव एसीबीकडे तक्रार नोंदवल्यानंतर आरोपीने लाच घेताच मंगळवारी सायंकाळी सहा वाजेच्या सुमारास त्यास अटक करण्यात आली. संशयिताला न्यायालयाने दोन दिवसांची पोलीस कोठडी सुनावली. तपास जळगाव एसीबीचे उपअधीक्षक सुहास देशमुख यांच्या मार्गदर्शनाखाली सुरू आहे.
