मुंबई (वृत्तसंस्था) बॉलिवूड ड्रग केसमध्ये एनसीबीने अभिनेता एजाज खानला ताब्यात घेतलं आहे. काही दिवसांपूर्वी मुंबईतून एनसीबीनं शादाब बटाटा या ड्रग्ज पेडलरला अटक केली होती. बॉलिवुडमधल्या अनेक सेलिब्रिटींना तो ड्रग्ज पुरवत असल्याचं समोर आलं होतं. शादाबच्या चौकशीतूनच अभिनेता एजाज खानचं नाव समोर आलं होतं. अखेर त्याला एनसीबीनं ताब्यात घेतलं आहे.
एनसीबीचं पथक एजाजच्या अंधेरी आणि लोखंडवाला यांसारख्या अनेक ठिकाणी छापेमारी केली असून अद्यापही एनसीबीची कारवाई सुरु आहे. एजाज खान आज राजस्थानमधून मुंबईमध्ये दाखल झाला होता, तेव्हा विमानतळावरूनच त्याला एनसीबीनं ताब्यात घेतलं आहे. एनसीबीने मुंबईतील सर्वात मोठा ड्रग सप्लायर फारूख बटाटाचा मुलगा शादाब बटाटाला काही दिवसांपूर्वी अटक केली होती. जवळपास २ कोटी रुपयांचे ड्रग्ज त्याच्याकडून ताब्यात घेण्यात आले होते. शादाब बटाटावर मुंबईतील बॉलिवूड सेलिब्रिटींना ड्रग्स पुरवण्याचा आरोप आहे. फारूख पूर्वी बटाटे विकत होता. त्यावेळी तो अंडरवर्ल्डच्या काही लोकांच्या संपर्कात आला आणि सध्या तो मुंबईतील सर्वात मोठा ड्रग्स सप्लायर म्हणून ओळखला जातो. ड्रग्जच्या या जाळ्यातील सर्व कामं सध्या त्याची दोन्ही मुलं पाहतात.
बिग बॉसमधून झाला होता आऊट!
एजाज खानला बिग बॉस या रिअॅलिटी शोमधून बाहेर काढण्यात आलं होतं. शोच्या नियमानुसार स्पर्धक एकमेकांवर हात उचलू शकत नाहीत. मात्र, शोदरम्यान एजाज खानने एका स्पर्धकावर वादावादीमध्ये हात उचलल्यामुळे त्याला शोमधून बाहेर काढण्यात आलं होतं. द कपिल शर्मा शोमध्ये देखील एजाज खाननं वाद घातल्याचं समोर आलं होतं. रक्त चरित्र २, अल्ला के बंदे अशा सिनेमांमध्ये एजाज खानने भूमिका साकारली आहे. २००३ मध्ये आलेल्या पथ सिनेमामधून त्यानं सिनेविश्वात पदार्पण केलं होतं. त्यानंतर लम्हे या सिनेमात देखील त्याने व्यक्तीरेखा साकारली होती.
अभिनेता अर्जुन रामपाल दक्षिण आफ्रिकेला पसार होण्याची शक्यता होती : NCB
बॉलिवूड ड्रग्ज कनेक्शन संबंधी तपास करणाऱ्या NCB ने अभिनेता अर्जुन रामपालची चौकशी सुरु केली होती. या दरम्यान NCB अशी शंका होती की अर्जुन रामपाल दक्षिण आफ्रिकेला पळून जाण्याची शक्यता आहे. म्हणून तशा आशयाचे एक पत्रही NCB ने दक्षिण आफ्रिकेच्या काऊन्सलेट जनरलला लिहिले होते. NCB च्या चार्जशीटमधून हा खुलासा झाला आहे.
अर्जुन रामपालच्या घरी छापेमारी केल्यानंतर त्याच्या घरातून काही गोळ्या आणि इतर सामान NCB ने जप्त केलं होतं. त्यानंतर त्याची चौकशीही करण्यात आली होती. या दरम्यान, अर्जुन रामपाल भारत सोडून दक्षिण आफ्रिकेला पसार होण्याची शक्यता NCB ला होती. NCB बॉलिवूडचे ड्रग्ज कनेक्शनचा तपास करत असून अजूनही अर्जुन NCB च्या रडारवर आहे.
ड्रग्ज प्रकरणात एनसीबीने १३ नोव्हेंबरला बॉलिवूड अभिनेता अर्जुन रामपालची सात तास चौकशी केली होती. ही चौकशी सुरु असताना अर्जुन रामपालचा विदेशी मित्र पॉल गियर्डला अटक करण्यात आली होती. त्याआधी एनसीबीने अर्जुन रामपालची गर्लफ्रेंड गॅब्रिएला डेमेट्रायडिसची सलग दोन दिवस चौकशी केली होती.
