जळगाव (प्रतिनिधी) शिक्षक पात्रता परीक्षेतील (टीईटी) गैरव्यवहार प्रकरणी पुणे पोलिसांनी आज जळगावात धाडसत्र राबविल्यामुळे प्रचंड खळबळ उडाली आहे.
जळगाव शहरातील गोलाणी मार्केटमध्ये असलेल्या बालाजी जॉब प्लेसमेंट येथे टीईटी घोटाळ्याचा तपास करणाऱ्या विशेष पथकाने आज सकाळी धाडसत्र राबवल्याची माहिती समोर येत आहे. या धाडसत्रात पोलिसांनी नेमकी काय कारवाई केली? किती जणांना ताब्यात घेतले किंवा काय कागदपत्र जमा केली? याचा तपशील मिळू शकला नसला तरी या कारवाईच्या वृत्ताला पुणे पोलिसांनी दुजोरा दिला आहे.
जळगाव, भडगावसह यावल व पारोळा तालुक्यातील काही एजंटाकरवी जिल्ह्यात टीईटी घोटाळ्यातील गैरव्यवहाराला मोठी चालना देण्यात आली होती. चौकशीनंतर तपासाची दिशा त्यांच्यादिशेने असेल, हे स्पष्ट झाले होते. दरम्यान, जी.ए. सॉफ्टवेअरचा संचालक डॉ. प्रीतीश देशमुख याच्याबरोबर सुरंजित गुलाब पाटील (५०) रा.उत्तरानगर, नाशिक, स्वप्निल तीरसिंग पाटील रा.शिक्षक कॉलनी, चाळीसगाव, जळगाव अशी अटक केलेल्यांची नावे होती.
