जळगाव (प्रतिनिधी) बीएचआर पतसंस्थेतील कोट्यावधींच्या घोटाळा प्रकरणातील मुख्य संशयित सुनील झंवर याचा मुलगा सुरज झंवरला आज पुणे आर्थिक गुन्हे शाखेच्या पथकाने अटक केल्यामुळे प्रचंड खळबळ उडाली आहे.
बीएचआर घोटाळ्यातील मुख्य संशयित सुनील झंवर हा गुन्हा दाखल झाल्यापासून बेपत्ता आहे. पुणे आर्थिक गुन्हे शाखेची दोन-तीन पथके राज्यभर त्याचा शोध घेत आहे. तशात झंवर याचा मुलगा सुरज झंवरला आज पुणे आर्थिक गुन्हे शाखेच्या पथकाने अटक केली आहे. या वृत्ताला आर्थिक गुन्हे शाखेच्या उपायुक्त भाग्यश्री नवटके यांनी दुजोरा दिला. सुरज झवरला जळगावच्या घरून सायंकाळी सात वाजेच्या सुमारास अटक करण्यात आली. त्यानंतर सुरज झंवरला घेवून आर्थिक गुन्हे शाखेचे पथक तात्काळ पुण्याच्या दिशेने रवाना झाले. दरम्यान, नाशिकमधील मांडसांगवी येथील १०० कोटीची जमीन बीएचआर पतसंस्थेतील कोट्यावधींच्या घोटाळा प्रकरणातील मुख्य संशयित सुनील झंवरने अवघ्या तीन कोटीत घेतली होती. या प्रकरणाची मुख्यमंत्री उद्धव ठाकरे यांनी गंभीर दखल घेत जिल्हाधिकाऱ्यांना चौकशी आदेश दिले होते. त्यानंतर आता अपर महसूल सचिवांनी न्यायाधिकरणाने दिलेल्या निर्णयाविरोधात जिल्हाधिकारी व विभागीय आयुक्तांना आव्हान याचिका दाखल करण्याचे आदेश दिल्यामुळे झंवरच्या अडचणीत मोठी वाढ झाली आहे. तशात आता झंवरच्या मुलाला अटक झाल्यामुळे त्याच्या भोवतीचा फास अधिक घट्ट होतांना दिसत आहे.
