जळगाव (प्रतिनिधी) दहशतवाद विरोधी पथकाने (ATS) बंदी घातलेल्या पॉप्युलर फ्रंट ऑफ इंडियाच्या (PFI) जळगावच्या एका कार्यकर्त्यांला अटक केली आहे. उन्नैस उमेर खय्याम पटेल (वय ३१, रा.अक्सा नगर, जळगाव), असे अटक केलेल्या संशयिताचे नाव असून नाशिकच्या गुन्ह्यात अटक करण्यात आलेल्या आरोपींचे मोबाईल संभाषण नष्ट करत होता, अशी माहिती एका ATS अधिकाऱ्याने दिली आहे.
राष्ट्रीय तपास यंत्रणा (एनआयए) आणि सक्तवसुली संचालनालयाच्या (ईडी) नेतृत्वाखाली राज्यात दहशतवादविरोधी पथकाच्या नाशिक पथकाने २२ सप्टेंबर रोजी छापासत्र राबवून राज्यभरातून पाच संशयितांना अटक केली आहे. या सदस्यांना २६ दिवस एटीएस कोठडी सुनावल्यानंतर त्यांची रवानगी मध्यवर्ती कारागृहात करण्यात आली आहे. दरम्यान, अटकेत असलेल्या संशयितांनी खबरदारी म्हणून त्यांचा मोबाइल फॉरमॅट करून त्यातील सर्व संवेदनशील माहिती पुसून टाकल्याचे एटीएसच्या लक्षात आले होते. उनैस याने अटकेतील पीएफआय पदाधिकाऱ्यांचे मोबाइल आणि लॅपटॉप फॉरमॅट केल्याचा संशय आहे.
मोबाइल फॉरमॅट केल्याचे तपासात समोर
संशयितांनी उन्नैस पटेल याची मदत घेऊन त्यांचे मोबाइल फॉरमॅट केल्याचे तपासात समोर आले. याआधी अटक केलेल्या संशयितांपैकी उन्नैसचा वसीम शेख याच्यासोबत संपर्क आला होता. त्याच्या मार्फत उन्नैस कय्युम शेखचा मोबाईल फॉरमॅट करून दिल्याचे एटीएसच्या तपासात समोर आले. त्याचप्रमाणे या संशयितांचा क्रिएटीव्ह माईड्स ग्रुप नावाचा व्हॉट्सअप ग्रुपही असल्याचे समोर आले. उन्नैसच्या मोबाइलमध्ये दोन ऑडीओ क्लीप आढळून आल्या असून त्यातील संभाषण आक्षेपार्ह असल्याचा दावा करण्यात आला आहे. त्यामुळे एटीएसच्या पथकाने उन्नैस पटेल याची सुरुवातीस चौकशी करीत पुरावे आढळल्यानंतर त्यास शुक्रवारी (दि.२१) अटक केली. त्याला शनिवारी (दि.२२) न्यायालयात हजर करण्यात आले. सरकारी पक्षातर्फे विशेष सरकारी वकील अजय मिसर यांनी युक्तीवाद करीत १४ दिवसांच्या कोठडीची मागणी केली. त्यात संशयित उन्नैस याने संशयितांचा मोबाइल फाॅरमॅट कसा केला, त्यात कोणता डाटा होता, ही माहिती गोळा करण्यासाठी कोठडीची आवश्यकता असल्याचे सांगितले. त्यानुसार न्यायालयाने उणेस पटेल यास चार नोव्हेंबर पर्यंत एटीएस कोठडी सुनावली आहे.
उनैसच्या मोबाइलमध्ये आक्षेपार्ह संभाषणाच्या दोन ऑडीओ क्लीप सापडल्या
अटकेत असलेल्या सर्वांचाच एटीएसने अतिशय कसून तपास केला आहे. त्यात अनेक धक्कादायक बाबी समोर आल्या आहेत. २०४७ पर्यंत भारताला मुस्लिम राष्ट्र बनवणे, राम मंदिराच्या जागी बाबरी मशिद उभारणे असे कारस्थान पीएफआयच्यावतीने रचले जात होते. सध्या अटक केलेल्या उनैस याचा वसीम शेख याच्यासोबत संपर्क आला होता. त्याच्या मार्फत उनैसने कय्युम शेख याचा मोबाईल फॉरमॅट करून दिला. शिवाय या सर्व आरोपींचा क्रिएटीव्ह माईंड्स नावाचा व्हॉट्सअॅप ग्रुप होता. उनैसच्या मोबाइलमध्ये दोन ऑडीओ क्लीप एटीएसला सापडल्या आहेत. या क्लिपमधील संभाषण अतिशय आक्षेपार्ह असल्याचे एटीएसच्या निदर्शनास आले आहे. त्याआधारेच उनैसला अटक करण्यात आली आहे. उनैस याने संशयितांचा मोबाइल का फाॅरमॅट केला, कसा केला, त्यात कोणती संवेदनशील माहिती होती, हे फॉरमॅट करण्यास कुणी सांगितले होते, उनैस कुणाकुणाच्या संपर्कात होता, आदी बाबींची चौकशी सध्या एटीएसकडून केली जात आहे. तसेच नाशिकच्या न्यायालयात हजर केलेल्या संशयिताचे संगणक, मोबाइल, हार्डडिस्क, बँकेचे व्यवहार तपास यंत्रणांकडून तपासण्यात आल्याचे कळते.
उनैसवर जळगाव एटीएसकडून सप्टेंबर महिन्यात प्रतिबंधात्मक कारवाई
जळगाव दहशतवाद विरोधी शाखा, एमआयडीसी पोलीस आणि स्थानिक गुन्हे शाखेच्या यांच्या संयुक्त पथकाने पॉप्युलर फ्रंट ऑफ इंडिया (पीएफआय) या संस्थेशी संबंधित उनैस उमर खय्याम पटेल (वय ३१, रा.अक्सा नगर, जळगाव) याला २७ सप्टेंबर रोजी पहाटे साडे तीन वाजता त्याच्या घरातून ताब्यात घेतले होते. त्याच्यासोबत शहाद्याचा एक तरुण होता. चौकशीअंती त्याला सोडून देण्यात आले होते. तर पटेल याला सीआरपीसी १५१ (३) प्रमाणे प्रतिबंधात्मक कारवाई करून अटक करत कोर्टात हजर केल्यानंतर त्याची जामिनावर सुटका झाली होती.
याआधी अटक केलेले पाच संशयित
नाशिकच्या एटीएस पथकाने मालेगावातून संशयित मौलाना सैफुर्रहमान सईद अन्सारी (२६, रा. हुडको कॉलनी, मालेगाव), पुण्यातून अब्दुल कय्युम बादुल्ला शेख (४८), रझी अहमद खान (३१, रा. दोन्ही रा. कोंढवा, पुणे), वसीम अझीम उर्फ मुन्ना शेख (२९, रा. अजीजपुरा, बीड), मौला नसीसाब मुल्ला (रा. सुभाषनगर, कोल्हापूर) या पाच सदस्यांना अटक केली आहे. ते सध्या न्यायालयीन कोठडीत आहेत.
