बुलढाणा (प्रतिनिधी) समृद्धी महामार्गावर एक खाजगी ट्रॅव्हल्स जळून खाक झाली असून या बसमधील २५ प्रवाशांचा होरपळून दुर्दैवी मृत्यू झाल्याने महाराष्ट्र हादरला आहे. अपघाताची माहिती मिळताच पालकमंत्री गुलाबराव पाटील हे घटनास्थळी दाखल झाले असून त्यांनी जखमींची विचारपूस केली. तसेच मृतांच्या नातेवाईकांचे सांत्वन केले.
जिल्ह्याचे पालकमंत्री गुलाबराव पाटील यांनी जखमींना भेट देण्यासाठी बुलढाण्यातील शासकीय रुग्णाला भेट दिली. त्यावेळी त्यांनी असे भयंकर अपघात रोखण्यासाठी गरज पडल्यास अपघात रोखण्यासाठी कडक कायदे करण्याचे सुतोवाच केले आहे. तर मुख्यमंत्री व उपमुख्यमंत्री घटनास्थळी भेट देणार असल्याचेही त्यांनी सांगितले. झालेली घटना अत्यंत मनाला खेद देणारी असून अशा भयानक अपघात भविष्यात रोखण्याकरिता सर्व त्या उपाययोजना केल्या जातील. तसेच अपघाताची संपूर्ण चौकशी करून कुणीही दोषी आढळल्यास कडक कारवाई करण्यात येईल, असेही ना. पाटील यांनी सांगितले.
विदर्भ ट्रॅव्हल्सची MH 29 BE – 1819 क्रमांकाची ही बस नागपूरहून पुण्याकडे जात होती. ३० जूनला नागपूरहून संध्याकाळी ५ वाजता पुण्यासाठी ही बस निघाली होती. १ जुलै च्या रात्री १.२२ मिनिटांनी धावत्या गाडीचे समोरील टायर अचानक निघाल्याने ट्रॅव्हल्स समृद्धी महामार्गावरील पुलावरील दुभाजकाला धडकून पलटी झाली. त्यानंतर काही मिनिटामध्ये पेट घेतल्यानंतर गाडीचा स्फोट होऊन ही खासगी प्रवासी बस पेटली आणि अपघात झाला. या अपघातात आगीत होरपळून २५ जणांचा मृत्यू झाला.
बुलढाणा जिल्ह्यातील सिंदखेडराजाजवळ समृद्धी महामार्गावर खाजगी बसच्या झालेल्या भीषण अपघाताबद्दल मुख्यमंत्री एकनाथ शिंदे यांनी तीव्र दुःख व्यक्त केले आहे. या अपघातातील मृत आणि त्यांच्या कुटुंबिंयांप्रति सहवेदना प्रकट करुन या दुर्दॅवी घटनेतील मृतांच्या नातेवाईकांना मुख्यमंत्री सहायता निधीमधून प्रत्येकी ५ लाख रुपयांची मदत मुख्यमंत्र्यांनी जाहीर केली आहे.
या भीषण अपघाताने आपण व्यथित झाल्याची भावना व्यक्त करत मुख्यमंत्र्यांनी या घटनेच्या चौकशीचे आदेश ही दिले आहेत. मुख्यमंत्री एकनाथ शिंदे यांनी पालकमंत्री ना.गुलाबराव पाटील, बुलढाण्याचे जिल्हाधिकारी आणि पोलीस अधिक्षकांशी दूरध्वनीवर संपर्क साधून या घटनेची माहिती घेतली. अपघातग्रस्तांना तातडीने मदत करण्याच्या सूचना देतानाच जखमींना शासकीय खर्चाने तात्काळ वैद्यकीय उपचार पुरविण्याचे निर्देशही मुख्यमंत्र्यांनी दिले. ही दुर्घटना कळताच तातडीने महामार्गासाठी तैनात आपत्कालीन वैद्यकीय सेवा पथक तसेच अग्निशमन दल त्याठिकाणी पोहचले आणि त्यांनी बचाव कार्य सुरु केले. जखमी प्रवाशांना काढून त्यांना रुग्णालयात भरती करण्यात आले.
