मुंबई (वृत्तसंस्था) मोठे साहेब, नेहमीच अदृश्य हाताने कटकारस्थान करण्यात माहीर असतात. पण, आता शंकराचा तिसरा डोळाही उघडला आहे, असं सूचक सूचक ट्विट करून अप्रत्यक्ष इशारा भाजपकडून देण्यात आला आहे.
विरोधी पक्षनेते देवेंद्र फडणवीस यांनी विधानसभेत ‘पेनड्राईव्ह बॉम्ब’ टाकून महाविकासआघाडीला मोठा धक्का दिला आहे. या धक्क्यामुळे महाविकासआघाडीचे नेते पुरते भांबावून गेले आहेत. विशेष म्हणजे यावेळी देवेंद्र फडणवीस यांनी महाविकासआघाडीचे शिल्पकार आणि मार्गदर्शक शरद पवार यांच्यावर थेट आरोप केले आहेत. त्यामुळे आता शरद पवार यावर काय बोलणार, याकडे सर्वांच्या नजरा लागल्या आहेत. या पार्श्वभूमीवर भाजपकडून गुरुवारी रात्री एक सूचक ट्विट करण्यात आले. या ट्विटमध्ये म्हटले आहे की, मोठे साहेब, नेहमीच अदृश्य हाताने कटकारस्थान करण्यात माहीर असतात. पण, यावेळी ते अदृश्य हात ही जनतेला योग्य वेळी दाखवू! मोठ्या साहेबांचा पोपट मिठू मिठू बोलत होता, मोठ्या साहेबांची नजर असते. पण, त्या पोपटाला माहिती नाही की, ‘शंकराचा तिसरा डोळाही उघडला आहे..’, असा अप्रत्यक्ष इशारा भाजपकडून देण्यात आला आहे.
देवेंद्र फडणवीस यांनी विधानसभेत सरकारी यंत्रणेच्या माध्यमातून भाजप नेत्यांना संपवण्याचे कारस्थान कशाप्रकारे सुरु आहे, याचा तपशील सादर केला होता. विशेष सरकारी वकील प्रवीण चव्हाण यांच्या कार्यालयातील स्टिंग ऑपरेशनमध्ये टिपण्यात आलेले संभाषण देवेंद्र फडणवीस यांनी सभागृहात वाचून दाखवले. यामध्ये प्रवीण चव्हाण यांनी शरद पवार यांचा उल्लेख केल्याचे आढळते. अजित पवार सपोर्ट करीत नाही. पर बडे साब सब देख रहे है. साहेब कधीच पिक्चरमध्ये येत नाहीत. ते कुणाला तरी घरी बोलावून सांगतात. थेट फोन केला तर उगाच स्टेशन डायरीत नोंद नको. पण, शरद पवार यांना संपवायचेच आहे, गिरीश महाजन आणि देवेंद्र फडणवीस यांना १ लाख १ टक्के, गिरीश महाजन आणि फडणवीस यांना अडकवणारच. पुढच्यावर्षीपर्यंत काढायचेच आहे. म्हणजे मग फडणवीस संपतो, असे प्रवीण चव्हाण यांनी म्हटल्याचा दावा देवेंद्र फडणवीस यांनी केला होता.
