पाचोरा (प्रतिनिधी) शिवसेना उद्धव बाळासाहेब ठाकरे पक्षाच्या महाप्रबोधन यात्रेनिमित्त जाहीर सभेत आमदार किशोर पाटील यांच्यावर आक्षेपार्ह टीका केल्यावरून युवासेनेचे राज्य विस्तारक शरद कोळी यांच्याविरुद्ध पाचोरा येथील पोलीस ठाण्यात गुन्हा दाखल करण्यात आला आहे. शरद कोळी यांच्याविरुद्ध याआधी धरणगाव, एरंडोल पोलिसात गुन्हे दाखल आहेत.
काय म्हटलंय नेमकं तक्रारीत
सविस्तर वृत्त असे कि, शहरातील मानसिंगा मैदानावर दि २ रोजी रात्री ७ वाजेच्या सुमारास शरद विठ्ठल कोळी (रा.सोलापूर) यांनी पाचोरा भडगाव विधानसभा मतदार संघाचे आमदार किशोरआप्पा पाटील यांना उद्देशून चिथावणी खोर भाषा वापरात शिवीगाळ केली. तसेच बदनामीकारक वक्तव्य करून जीवे ठार मारण्याची धमकी दिली. एवढेच नव्हे तर गद्दार म्हणून बरेचदा संबोधून त्यांचा जनमानसात अपमान केला. याबाबत किशोर गुणवतराव बारवकर यांनी दिलेल्या फिर्यादीवरून पाचोरा पोलीस स्थानकात भादवि कलम १५३,५००, ५०४, ५०६ प्रमाणे गुन्हा दाखल करण्यात आला असून पुढील तपास पो.प्रताप इंगळे हे करीत आहेत.
धरणगाव येथे पहिला गुन्हा
धरणगाव येथे कोळी यांच्याविरुद्ध पहिला गुन्हा दाखल करण्यात आला होता. पाणीपुरवठा व स्वच्छतामंत्री तथा पालकमंत्री गुलाबराव पाटील आणि गुजर समाजाविषयी खालच्या पातळीवरून टीका करण्यासाठी हा गुन्हा दाखल करण्यात आला होता. यानंतर जिल्हाधिकार्यांनी आदेश काढत कोळी यांच्या भाषणावर बंदी घालण्यात आली, तर नंतर पोलिसांनी त्यांना ताब्यात घेण्यापूर्वीच ते जिल्ह्यातून पसार झाले.
एरंडोलला दुसरा गुन्हा
कोळी यांनी आधी एरंडोल येथील जाहीर सभेत आमदार चिमणराव पाटील यांच्याविषयी आक्षेपार्ह शब्दांमध्ये टीका केली होती. यामुळे बाळासाहेबांची शिवसेना पक्षाचे तालुकाध्यक्ष रवींद्र जाधव, राजेंद्र चौधरी आणि शालिग्राम गायकवाड यांनी एरंडोल येथील पोलीस ठाण्यात फिर्याद दिली. त्यानुसार कोळी यांच्याविरोधात गुन्हा दाखल करण्यात आला आहे.
