जळगाव (प्रतिनिधी) जागतिक दिव्यांग दिनाच्या निमित्ताने डॉ. बाबासाहेब आंबेडकर सामाजिक न्याय भवन, जळगांव येथे सहाय्यक आयुक्त, समाज कल्याण, जिल्हा दिव्यांग पूर्नवसन केंद्र, यांच्या संयुक्त विद्यमाने प्रातिनिधीक स्वरुपात दिव्यांग व्यक्तींना सहायक साहित्य वाटप करणे व उल्लेखनीय/विशेष कार्य करणा-या जिल्ह्यातील दिव्यांग व्यक्तींचा सन्मानाचा कार्यक्रम जिल्हाधिकारी अभिजीत राऊत यांच्या अध्यक्षतेखाली साजरा करण्यात आला.
तसेच के. एच. ठोंबरे, सचिव, जिल्हा विधी सेवा प्राधिकरण, ॲड. दिलीप बोरसे, अध्यक्ष, जिल्हा बार असोसिएशन, यांच्या प्रमुख उपस्थितीत पार पडला. सामाजिक न्याय भवनात आयोजित कार्यक्रमात “ स्वयंदीप ” संस्थेच्या संस्थापिका मिनाक्षी निकम यांनी दिव्यांगाना येणाऱ्या अडचणी व त्यावर दिव्यांगानी केलेली मात याबाबत आपले मनोगत व्यक्त केले. दिव्यांगाना शासकीय कार्यालयात येणाऱ्या अडचणी तसेच इतर कायदेशीर सल्ला हवा असल्यास जिल्हा विधी सेवा प्राधिकरणाशी संपर्क साधण्याचे आवाहन जिल्हा विधी सेवा प्राधिकरणामार्फत के. एच. ठोंबरे, सचिव, जिल्हा विधी सेवा प्राधिकरण, जळगांव यांनी केले. जिल्हाधिकारी अभिजित राऊत यांनी दिव्यांगांच्या सर्वांगीण विकासासाठी सर्वोतोपरी सहकार्य प्रशासनाकडून करण्यात येईल असे सांगितले. कार्यक्रमाप्रसंगी उपस्थित मान्यवरांनी दिव्यांग व्यक्तींनी तयार केलेल्या विविध वस्तू तसेच साहित्यांची पाहणी केली. या कार्यक्रमास सहाय्यक आयुक्त, समाज कल्याण योगेश पाटील, जिल्हा महिला व बाल कल्याण अधिकारी विजय परदेशी, इंडियन रेडक्रॉस सोसायटीचे उपाध्यक्ष गनी मेनन, तसेच जिल्हा दिव्यांग पूर्नवसन केंद्राचे केंद्रप्रमुख गणेशकर यांच्यासह अन्य मान्यवर उपस्थित होते.