जळगाव / धुळे (प्रतिनिधी) एम.आय.डी.सी. मधील औद्योगिक ग्राहकांना देणाऱ्या विज पुरवठ्याच्या विविध समस्यांवर चर्चा करण्यासाठी महावितरण अधिकारी व औद्योगिक संघटनेचे प्रतिनिधी / ग्राहक यांची संयुक्त बैठक महावितरणच्या जळगाव परिमंडलाचे मुख्य अभियंता इब्राहिम मुलाणी यांच्या अध्यक्षतेखाली व अधिक्षक अभियंता नीरज वैरागडे यांच्या उपस्थितीत घेण्यात आली.
सदर बैठकीस औद्योगिक ग्राहक संघटनेचे प्रतिनिधी नितिन बंग, नितिन देवरे, भरत पाटील, वर्धमान संघवी, नितिन अग्रवाल, सुभाष कांकरीया, बेदमुथा इंडस्ट्रीज, आर. एम. फॉस्फेटचे प्रतिनिधी व महावितरणचे कार्यकारी अभियंता जितेंद्र महाजन, प्रताप मचिये व इतर अधिकारी उपस्थित होते. बैठकीत संघटना प्रतिनिधी यांनी एम.आय.डी.सी. मध्ये येणाऱ्या वीज पुरवठ्याच्या समस्या मांडल्या, त्यावर आवश्यक ती देखभाल व दुरुस्तीचे कामे त्वरीत करण्यात येऊन वीज पुरवठा अखंडित ठेवण्याची दक्षता घेण्यात येईल असे महावितरणतर्फे सांगण्यात आले.
औद्योगिक ग्राहकांचा व्हाट्सॲप गृप तयार केला असून त्यावर तक्रारी करणे व महावितरण तर्फे निवारणसाठी लागणारा वेळ त्यात कळविण्याचे सांगण्यात आले. शनिवारी नियोजित देखभाल आणि दुरुस्तीची घेण्यात येणारी कामे २४ तास अगोदर कळविण्यात येईल. तसेच यंत्रणा सक्षमीकरणासाठी ३३ के.व्ही चा दुसरा फिडर कार्यान्वित करण्यात आला असून नवीन १३२ के.व्ही. एम.आय.डी.सी. चा प्रस्ताव मुख्य कार्यालयास सादर केला असल्याचे महावितरण तर्फे सांगण्यात आले.
