जळगाव (प्रतिनिधी) शहरात आज दोन अट्टल मोटारसायकल चोरटे येणार असल्याची गुप्त माहिती शहर पोलीस स्थानकातील डीबी पथकाला मिळाली होती. त्यानुसार पथकाने सापळा रचला. परंतु चोरट्यांना पोलीस असल्याचा संशय येताच त्यांनी पळ काढला. शहर पोलिसांच्या पथकाने अखेर सिनेस्टाईल पाठलाग करत दोघांना अटक केली. जीवन सुखदेव ठाकरे (वय-२२, रा.कोळीवाडा डांभुर्णी, ता. यावल), पवन सुनील कोळी (वय-२२, कोळीवाडा,डांभुर्णी ता.यावल) असे ताब्यात घेतलेल्या दोघं संशयित मोटारसायकल चोरांची नाव आहेत.
शहरात होत असलेल्या मोटरसायकल चोरी प्रकरणी पोलीस निरीक्षक धनंजय यांनी एक पथक तयार करून त्यांना गुन्हे उघडकीस आणण्यात संदर्भात आदेश दिले होते. त्यानुसार पथकातील पो.ना.गणेश पाटील, पो.कॉ. पंचलिंग यांना गुप्त बातमी बातमीदारामार्फत माहिती मिळाली होती की, जीवन ठाकरे व पवन कोळी यांनी शहरातील बऱ्याच मोटारसायकली चोरी केली असून ते आजही जळगावात पुन्हा मोटरसायकल चोरीसाठी येणार आहेत. त्यानुसार सदर पथकातील सहाय्यक फौजदार वासुदेव सोनवणे, पो.हे.कॉ. विजय निकम, भास्कर ठाकरे, अक्रम शेख, प्रफुल धांडे, रतन गिते यांच्या पथकाने स्मशानभूमीजवळ सापळा रचला. संशयित मोटरसायकलला पथकाने थांबवण्याचा प्रयत्न केला असता त्यांनी पळ काढला. परंतु पोलिसांच्या पथकाने पाठलाग करून अखेर त्यांना पकडले. चौकशी दरम्यान त्यांनी त्यांच्या ताब्यात असलेली मोटारसायकल देखील चोरीचे असल्याचे मान्य केले. तसेच आज देखील शहरात मोटरसायकल चोरीसाठी आले असल्याचे सांगितले. तसेच ताब्यातील चोरलेली मोटरसायकल ही शहरातील बिग बाजार या ठिकाणावरून चोरल्याची कबुलीही दिली.
फक्त हिरो डीलक्स कंपनीच्या मोटरसायकलची चोरी
जीवन ठाकरे, पवन कोळी आणि त्यांचा साथीदार फक्त हिरो डीलक्स कंपनीच्या मोटरसायकल चोरी करायचे. दरम्यान, दोघं चोरट्यांनी ६० हजार रुपये किमतीच्या दोन मोटारसायकली काढून दिल्या असून त्यांचा एक साथीदार फरार आहे. फरार आरोपीकडे काही मोटार सायकल असल्याचे देखील जीवन व पवन कोळी यांनी सांगितले.दोघा संशयितांना अटक करण्यात आली असून पुढील तपास पो.ना. भास्कर ठाकरे हे करीत आहे. दरम्यान, शहरातील शिवाजी नगरातील चंद्रकांत गजानन बोदवडे (रा. शिवाजी नगर) यांची दुचाकी (एमएच १९ सीजी ३५६५) १२ सप्टेंबर २०१९ रोजी शहरातील नेहरू पुतळ्याजवळील आयडीबीआय बँकेजवळून चोरीला गेली होती. या संदर्भात गुन्हा दाखल होता.
