जळगाव (प्रतिनिधी) – भावाच्या खूनाचा बदला घेण्यासाठी संशयिताच्या घराची जाळपोळ करणाऱ्या राजू नाना काळे (वय २९, रा. वाल्मिक नगर) याला खूनाच्या गुन्ह्यातील बंदी श्याम सुर्यवंशी याने कारागृहात बेदम मारहाण केली. तसेच त्याचे डोके भिंतीवर आपटून गंभीर जखमी केल्याची घटना दि. २६ मे रोजी दुपारच्या सुमारास जिल्हा कारागृहात घडली. याप्रकरणी श्याम तुकाराम सुर्यवंशी (रा. जैनाबाद) याच्याविरुद्ध गुन्हा दाखल करण्यात आला आहे.
शहरातील जैनाबाद परिसरात राहणाऱ्या नितीन काळे याचा संशयित श्याम सुर्यवंशी याने खून केला असून तो सध्या कारागृहात आहे. दि. २५ मे रोजी मध्यरात्रीच्या सुमारास संशयित श्याम सुर्यवंशी याच्या आईने काळे यांच्या कुटुंबियांना शिवीगाळ करीत माझ्या मुलास खूनाच्या गुन्ह्यात फसविले आहे असल्याचे म्हणत होती. त्याचा राग आल्यामुळे राजू काळे याने श्याम सुर्यवंशीच्या घराची तोडफोड करीत आग लावून दिली होती. याप्रकरणी त्याच्याविरुद्ध गुन्हा दाखल करुन त्याला दि. २६ मे रोजी जिल्हा कारागृहात न्यायालयीन बंदी म्हणून दाखल केले होते. दरम्यान, श्याम सुर्यवंशी हा देखील राजू काळे याच्या भावाच्या खूनाच्या गुन्ह्यात कारागृहात आहे.
डोके आदळले भिंतीवर
राजू काळे हा कारागृहातील बॅरेक क्रमांक ८ मध्ये गेल्यानंतर त्याला संशयित श्याम सुर्यवंशी याने पाठीमागून येवून त्याला मागील भांडणाचा राग मनात ठेवून मारहाण केली. तसेच शिवीगाळ करीत त्याला भिंतीवर आपटून त्याला गंभीर जखमी केले. कारागृहातील कर्मचाऱ्यांनी भांडण सोडविल्यानंतर जखमी राजू काळे याला उपचारार्थ जिल्हा रुग्णालयात दाखल केले.
डोक्यावर पडले चार टाके
राजू काळे याच्या डोक्याला चार टाके पडले असून त्याने उपचार घेतल्यानंतर दि. २६ मे रोजी जिल्हापेठ पोलिसात तक्रार दिली. त्यानुसार खूनाच्या गुन्ह्यातील संशयित श्याम सुर्यवंशी याच्याविरुद्ध गुन्हा दाखल करण्यात आला आहे. तपास सफौ संजय सोनवणे हे करीत आहे.
