यावल (सुरेश पाटील) महाराष्ट्र प्रदेश काँग्रेस कमिटी व प्रदेश अध्यक्ष नाना पटोले यांच्या आदेशानुसार आज यावल येथे प्रभाकर आप्पा सोनवणे व भगतसिंग बापु पाटील यांच्या प्रमुख उपस्थितीत मोदी सरकार विरोधात आंदोलन करण्यात आले. मोदी सरकारचे सात वर्ष पूर्ण होत असल्याच्या पार्श्वभूमीवर काँग्रेस कमिटीतर्फे राज्यभर आंदोलन छेडण्यात आले आहे.
केंद्र सरकारचे ३० मे २०२१ रोजी सात वर्ष पूर्ण होत आहेत. मोदी सरकारच्या सात वर्षांच्या कार्यकाळात देशात काळोखच पसरला आहे. देशाची ढासळती अर्थव्यवस्था, कोरोना साथ रोगामध्ये नियोजनातील अपयश, दररोज पेट्रोल व डिझेल भाववाढ, नोटबंदी व जीएसटीसारखे अपयशी निर्णय देशातील वाढती बेरोजगारी, शेतकऱ्यांविरोधात काळे कायदे इत्यादी पातळीवर केंद्रातील मोदी सरकार अपयशी झाले आहे.
यावेळेस उपस्थित शहराध्यक्ष कदिर खान, नगरसेवक रसुल शेठ, ओबिसी सेलचे अध्यक्ष अमोल भिरुड, नगरसेवक समिर मोमिन, तालुका उपाध्यक्ष हाजी गफफार शाह, शहर उपाध्यक्ष अनिल जंजाळे, अल्पसंख्याक शहराध्यक्ष रहेमान खाटीक, शहर सरचिटणीस नईम शेख, मागसवर्गीय अध्यक्ष विक्की गजरे, युनुस भाई, अस्लम शेख आदी कार्यकर्ते उपस्थित होते.
