नवी दिल्ली (वृत्तसंस्था) अल्पबचत योजनांवरील व्याजदरात कपात करण्याच्या केंद्र सरकारच्या निर्णयाने सगळ्यांनाच धक्का बसला. मात्र, निर्णयावर केंद्रीय अर्थमंत्री निर्मला सीतारामन यांनी काही तासांतच यू-टर्न घेतला. यावरून आता काँग्रेसचे नेते दिग्विजय सिंह यांनी मोदी सरकारवर टीकास्त्र सोडलं आहे. निवडणुकीमुळे मोदी-शाह-निर्मला सरकारने गरीब आणि सर्वसामान्य माणसांच्या अल्पबचत योजनांवरील व्याजदर कपातीचा निर्णय बदलला आहे. असं दिग्विजय यांनी म्हटलं होतं.
व्याजदरात कपात करण्याचा आदेश नजरचुकीने काढला गेल्याचं सांगत सीतारामन यांनी सावरासारव केली. मात्र, आता यावरून केंद्र सरकारवर टीका होत आहे. पाच राज्यात होत असलेल्या निवडणुकीमुळे मोदी सरकारने आदेश मागे घेतला असून, पुन्हा लागू केला जाईल, असं विरोधकांचं म्हणणं आहे. केंद्रीय अर्थमंत्री निर्मला सीतारामन यांनी दिलेल्या स्पष्टीकरणानंतर काँग्रेसचे नेते दिग्विजय सिंह यांनी मोदी सरकारवर टीका केली आहे. “मोदी-शाह-भाजपा सरकारच्या कार्यकाळात मजूर आणि सेवा बजावणाऱ्या कर्मचाऱ्यांवरच संकट कोसळताना दिसत आहे. त्यांच्या बचतीच्या व्याजदरात कपात करण्यात आली आहे,” असं दिग्विजय यांनी म्हटलं होतं. त्याचबरोबर निर्णय मागे घेतल्यावरूनही त्यांनी सवाल केला आहे.
“निवडणुकीमुळे मोदी-शाह-निर्मला सरकारने गरीब आणि सर्वसामान्य माणसांच्या अल्पबचत योजनांवरील व्याजदर कपातीचा निर्णय बदलला आहे. धन्यवाद. पण निवडणुका पार पडल्यानंतरही आपण व्याजदरात कपात करणार नाही, असं वचन निर्मलाजी यांनी द्यावं. कुणाच्या निगराणीखाली हे आदेश काढण्यात आले आणि अशा वेळेस ज्यावेळी भाजपा लोकांना आकर्षित करण्यासाठी हरतऱ्हेनं प्रयत्न करत असताना असा आदेश कसा काढला गेला? हे सुद्धा निर्मला सीतारामन यांनी सांगावं,” असा सवाल दिग्विजय सिंह यांनी उपस्थित केला आहे.
