साकळी ता.यावल (प्रतिनिधी) कोरोना संसर्गाचा धोका लक्षात घेता तालुक्यातील साकळी येथील बाजारपेठ भागातील जय दुर्गा मंडळाच्या वतीने नवरात्री उत्सव हा अतिशय साध्या पद्धतीने व प्रशासनाच्या नियमांचे काटेकोरपणे पालन करीत साजरा केला जात आहे. या उत्सवातील विशेष म्हणजे शासनाने काढलेल्या परिपत्रकानुसार यंदाच्या उत्सवात माझे कुटुंब माझी जबाबदारी या आरोग्य अभियानाबाबत जनजागृती करण्यात येत आहे.
हे पोस्टर स्वखर्चाने तयार करून डेकोरेशन म्हणून दर्शनी भागात लावलेले आहे. या पोस्टर मुळे कोरोनाचा आजार पसरु नये म्हणून आपण काय काळजी घेऊ शकतो ? कसा प्रतिबंध करू शकतो यासंदर्भात ची माहिती नागरिकांना मिळत आहे. दरम्यान दि.२० रोजी साकळी प्राथमिक आरोग्य केंद्राच्या वैद्यकीय अधिकारी डॉ. स्वाती कवडीवाले यांनी या देवी मंडळाच्या ठिकाणी भेट देऊन मंडळाने तयार केलेल्या आरोग्य जनजागृतीपर सजावटीचे कौतुक केलेले आहे व आपल्या आरोग्य विभागा तर्फे मंडळाचे आभार मानले आहे. या भेटीदरम्यान मंडळाचे सभासद रितेश नेवे, शशिकांत नेवे, पराग वाणी यांचेसह आरोग्य कर्मचारी तसेच आरोग्य स्वयंसेवक मिलिंद जंजाळे हे उपस्थित होते.
