चाळीसगाव (प्रतिनिधी) दुष्टप्रवृत्तीचा नाश हीच स्व.शुभमला श्रद्धांजली असेल, अशा भावना आमदार मंगेशदादा चव्हाण यांनी आज व्यक्त केल्यात. ते मुंबई पोलीस दलात कार्यरत असणाऱ्या शुभम आगोणे या तरुणाच्या हत्येच्या निषेधार्थ काढण्यात आलेल्या आक्रोश मोर्चात बोलत होते.
काही दिवसांपूर्वीच गुन्हेगारी प्रवृत्तीच्या समाजकंटकांनी मुंबई पोलीस दलात कार्यरत असणाऱ्या शुभम अनिल आगोणे या तरुणाची निर्घृणपणे हत्या केली होती. स्व.शुभमला न्याय मिळावा या मागणीसाठी आज चाळीसगाव शहरात आक्रोश मोर्चाचे आयोजन करण्यात आले होते. छत्रपती शिवाजी महाराज चौक याठिकाणी आलेल्या मोर्चात आमदार मंगेशदादा चव्हाण हे सहभागी झाले होते. यावेळी तहसीलदार व पोलीस निरीक्षक यांना निवेदन देण्यात आले.
यावेळी आमदार मंगेशदादा चव्हाण यांनी आपल्या भाषणात सांगितले की, शुभम मुंबई पोलीस दलात असल्याने मंत्र्यांच्या सुरक्षाव्यवस्था निमित्ताने त्याची आणि माझी नेहमी भेट होत असायची. मागील वर्षी झालेल्या रायगड वारीत तो आपल्या मित्र मंडळींसह तीन दिवस आमच्यासोबत होता. नुकत्याच झालेल्या नमो चषक स्पर्धेत देखील त्याच्या संघाने सहभाग नोंदवला होता. मात्र त्यांचा सामना होण्याच्या आदल्याच दिवशी ही दुर्दैवी घटना घडली.
गुन्हेगार हे गुन्हेगार असतात… त्यांना जात, धर्म, पक्ष नसतो… शुभम ची ज्याप्रकारे हत्या करण्यात आली ते पाहता अशी गुन्हेगारी प्रवृत्ती हद्दपार करणे ही आपल्या सर्वांची जबाबदारी आहे. मी सदर प्रकरणात वैयक्तिक लक्ष देणार असून लवकरात लवकर सदर खटला हा फास्टट्रॅक कोर्टात चालविण्यासाठी उपमुख्यमंत्री देवेंद्रजी फडणवीस यांच्याकडे मागणी करणार असल्याचेही आ. चव्हाण यांनी यावेळी सांगितले.
आज प्रभु श्रीराम यांच्या प्राणप्रतिष्ठा सोहळ्याच्या पार्श्वभूमीवर हाच संकल्प करूया की अश्या समाजविघातक प्रवृत्तीला कुठल्याही प्रकारचा थारा मिळणार नाही. शुभमला न्याय मिळेपर्यंत माझा पाठपुरावा सुरूच राहील, असे आश्वासनही आमदार चव्हाण यांनी यावेळी दिले.
