जळगाव (प्रतिनिधी) : व्यावसायिक कामासाठी विश्वासाने दिलेला जीएसटी कर शासनाकडे पूर्णपणे जमा न करता, बनावट ऑडिट रिपोर्ट तयार करून सीए असलेल्या पिता-पुत्राने ५ लाख ६५ हजार रुपयांच्या रकमेचा अपहार केला. ही धक्कादायक घटना उघडकीस आल्यानंतर बॅटरी व्यावसायीक अमीर वासुदेव बुधानी (वय ४०, रा. कृष्ण पावर, एमआयडीसी) यांनी एमआयडीसी पोलिसात तक्रार दिली. त्यानुसार विवेक मधुकर पिंगळे आणि अक्षय विवेक पिंगळे (दोघे रा. मायादेवी नगर) या सीए पिता-पुत्रांविरुद्ध फसवणुकीचा गुन्हा दाखल करण्यात आला आहे.
शहरातील एमआयडीसी भागात अमीत वासुदेव बुधानी (वय ४०) यांची कृष्णा पॉवर नावाची बॅटरी उत्पादन करणारी फर्म आहे. सन २०१२ पासून ते विवेक मधुकर पिंगळे आणि अक्षय विवेक पिंगळे (दोघे रा. मायादेवी नगर, जळगाव) यांच्याकडून आपल्या फर्मचे इन्कम टॅक्स, जीएसटी आणि ऑडिटचे काम करून घेत होते. तक्रारदार दर महिन्याला जीएसटी भरण्यासाठी लागणारी रक्कम पिंगळे पिता-पुत्रांच्या सांगण्यावरून त्यांच्या बँक खात्यात किंवा क्रिस्टल सर्व्हिसेस नावाच्या फर्ममध्ये ट्रान्सफर करत असत.
स्वतःच्या फायद्यासाठी वापरले ७१ लाख रुपये
बुधांनी यांना तपासणीअंती असे दिसून आले की, २०१९ ते २०२४ या काळात पिंगळे पिता-पुत्रांनी जीएसटी भरण्यासाठी एकूण १ कोटी ६८ लाख ९७ हजार ८५५ रुपये घेतले होते त्यापैकी केवळ ९७ लाख ३० हजार ९८३ रुपये शासनाकडे जमा केले. तर उर्वरित ७१ लाख ६६ हजार ८७२ रुपये स्वतःच्या फायद्यासाठी वापरून चुकीचे ऑडिट रिपोर्ट तयार केले.
७१ लाखांपैकी ६६ लाख केले परत
फसवणुकीची बाब लक्षात आल्यावर तक्रारदाराने जाब विचारला असता, संशयितांनी आपली चूक कबूल केली आणि वेळोवेळी ६६ लाख ९७९ रुपये परत केले. मात्र, उर्वरित ५ लाख ६५ हजार रुपये वारंवार मागणी करूनही परत न केल्याने अखेर बुधानी यांनी २५ मार्च रोजी एमआयडीसी पोलीस ठाण्यात धाव घेत, विवेक मधुकर पिंगळे आणि अक्षय विवेक पिंगळे यांच्याविरुद्ध गुन्हा दाखल केला आहे.
