धरणगाव (प्रतिनिधी) शहरातील नागरिकांना आता पाणीपुरवठा, आरोग्य, स्वच्छता, रस्ते, गटारी, पथदिवे, प्रशासन यांसारख्या विषयांवरील तक्रारी नोंदविण्यासाठी घरबसल्या डिजिटल सुविधा उपलब्ध झाली आहे. धरणगाव नगरपरिषदेने नागरिकांसाठी एक विशेष व्हॉट्सॲप क्रमांक – ९३७०३०१२८४ सुरु केला असून, या क्रमांकावर नागरिक आपली तक्रार, सूचना किंवा समस्या नोंदवू शकतात.
नगरपरिषदेने नागरिकांना आवाहन केले आहे की, संबंधित तक्रार करताना आपले नाव, मोबाईल क्रमांक, पत्ता, तक्रारीचे स्वरूप, ठिकाण आणि संबंधित फोटो यांचा समावेश असलेला मेसेज व्हॉट्सॲपवर पाठवावा. यामुळे तक्रारीचे अचूक स्वरूप समजून घेता येईल व त्यावर योग्य ती कारवाई करता येईल.
तक्रारी सादर करताना भाषा साधी, स्पष्ट व सन्मानजनक असावी, असे आवाहनही प्रशासनाने केले आहे. या उपक्रमाचा उद्देश नागरिक व नगरपरिषद यांच्यातील अंतर कमी करून सुसंवाद साधणे व तक्रारींचे त्वरित निराकरण करणे आहे.
धरणगाव नगरपरिषदेने हा उपक्रम सुरू करून प्रशासनाबाबत विश्वास निर्माण करण्याचा विधायक प्रयत्न केला आहे. नागरिकांनी हा क्रमांक सेव्ह करून सहकार्य करावे, असे आवाहन मुख्याधिकारी व नगरपरिषदेच्या वतीने करण्यात आले आहे.
– धरणगाव नगरपरिषद
