जळगाव (प्रतिनिधी) जिल्हा बँकेच्या निवडणुकीत उमेदवारांच्या अर्ज छाननीत अर्ज बाद ठरलेल्या माजी आमदार स्मिता वाघ आणि मुक्ताईनगर येथील नाना पाटील, दिलीप पाटील यांच्यासह आठ जणांचे अपील अर्ज देखील फेटाळण्यात आले आहे. तर महेंद्र सपकाळे यांचा अर्ज मंजूर करण्यात आला आहे. दरम्यान, अपील फेटाळलेले सर्व उमेदवार हे भाजपचे आहेत.
जिल्हा बँकेत निवडणूक निर्णय अधिकाऱ्यांनी उमेदवारी अर्ज बाद केल्याने त्यांच्या निर्णयाविरोधात उमेदवारांनी नाशिक विभागीय सहनिबंधकांकडे अपील दाखल केले होते. या अपीलावर सुनावणी होवून २८ ऑक्टोबर रोजी निर्णय देण्यात आला. या निर्णयात आठ जणांच्या अर्जावर खाली निवडणूक निर्णय अधिकाऱ्यांनी दिलेला निर्णय पुढेही कायम ठेवून अपील फेटाळण्यात आले. त्यामुळे भाजप उमेदवार माजी आमदार स्मिता वाघ, नाना पाटील, माधुरी अत्तरदे, दिलीप पाटील, प्रकाश पाटील यांच्यासह आठ जण उमेदवारी रिंगणातून बाहेर झाले आहेत. तर महेंद्र सपकाळे यांचा अर्ज मंजूर करण्यात आला. दरम्यान, अर्ज फेटाळलेले उमेदवार खंडपीठात याचिका दाखल करण्याची शक्यता आहे.
