जळगाव (प्रतिनिधी) चारीत्र्यावर संशय घेत वारंवार छळ केला जात असल्याने एका २८ वर्षीय महिलेने गळफास घेऊन आत्महत्या केल्याची धक्कादायक घटना शनिवार, २ मार्च रोजी सकाळी उघडकीस आली. जुलेखा गफ्फार पटेल (रा. भादली, ता. जळगाव), असे आत्महत्या केलेल्या महिलेचे नाव आहे. याबाबत नशिराबाद पोलिस ठाण्यात सासरच्या सात जणांविरुद्ध गुन्हा दाखल करण्यात आला आहे. यापैकी दोन जणांना अटक करण्यात आली आहे.
तालुक्यातील भादली येथील जुलेखा पटेल यांच्या पतीचे दोन वर्षांपूर्वी निधन झाले होते. त्यांना दोन मुले असल्याने ही महिला सासरीच राहत होती. शनिवार, २ मार्च रोजी सकाळी सात वाजेच्या सुमारास तिने गळफास घेऊन आत्महत्या केल्याचे समोर आहे. या विषयी सासरच्या मंडळींनी तिच्या माहेरी ही बाब कळविली. त्यानुसार माहेरील मंडळी शासकीय वैद्यकीय महाविद्यालय व रुग्णालयात पोहचले. महिलेचा मृत्यू झाल्यानंतर सासरच्या मंडळींनी तिचा मृतदेह स्वत: न आणता रिक्षात पाठवून दिल्याचे माहेरच्या मंडळींचे म्हणणे होते.
जुलेखा पटेल यांनी आत्महत्या केली नसून सासरच्या मंडळींनीच त्यांना मारले असल्याचा आरोप मयत महिलेच्या भावासह इतर नातेवाईकांनी केला. त्यामुळे जोपर्यंत सासरच्या मंडळींविरुद्ध गुन्हा दाखल होऊन त्यांना अटक होत नाही तोपर्यंत मृतदेह ताब्यात न घेण्याची भूमिका नातेवाईकांनी घेतली. या प्रकरणी मयत महिलेचे भाऊ हासीम याकूब पटेल यांनी नशिराबाद पोलिस ठाण्यात फिर्याद दिली. त्यावरून सासू असरफ मुसा पटेल, जेठ कालू उर्फ गयासोद्दीन पटेल, हारुण पटेल, ईसा पटेल, जेठाणी मदिना पटेल, मीना पटेल यांच्यासह वसीम सलीम पिंजारी (सर्व रा. भादली) यांच्याविरुद्ध आत्महत्येस प्रवृत्त केल्याचा गुन्हा दाखल करण्यात आला. त्यापैकी जेठ कालू पटेल व इसा पटेल यांना अटक करण्यात आले आहे.
घटनेची माहिती मिळाल्यानंतर मयत महिलेच्या माहेरची मंडळी सकाळी आठ वाजेच्या सुमारास रुग्णालयात पोहचले होते. सासरच्यांविरुद्ध गुन्हा दाखल होत नाही व अटक होत नाही, तोपर्यंत मृतदेह ताब्यात न घेण्याची भूमिका घेतल्याने या सर्व प्रक्रियेदरम्यान मृतदेह १० तास शवविच्छेदनगृहातच होता. तसेच सर्व मंडळी तोपर्यंत रुग्णालयात थांबून होते. गुन्हा दाखल होऊन दोघांना अटक झाल्यानंतर संध्याकाळी सहा वाजेच्या सुमारास मृतदेह ताब्यात घेण्यात आला व माहेरी नेण्यात आला.
