जळगाव (प्रतिनिधी) डॉ. जयप्रकाश रामानंद यांना अधिष्ठातापदी कायम ठेवावे, अशी मागणी शिवसेनेचे प्रभाग समिती सभापती तथा नगरसेवक प्रवीण कोल्हे व नगरसेविका मीनाताई धुडकू सपकाळे यांनी केली आहे. तसेच याबाबतचे निवेदनही पालकमंत्री ना. गुलाबराव पाटील यांना देण्यात येणार आहे.
शासकीय वैद्यकीय महाविद्यालय व रुग्णालय, जळगावचे अधिष्ठाता डॉ. जयप्रकाश रामानंद यांच्या जागी नागपूर येथील डॉ. मिलिंद फुलपाटील यांची अधिष्ठातापदी नियुक्ती राज्य शासनाच्या वैद्यकीय शिक्षण व औषधी द्रव्ये विभागाने दि. २६ ऑगस्ट रोजी केली आहे. डॉ. जयप्रकाश रामानंद यांनी १३ जून २०२० साली शासकीय वैद्यकीय महाविद्यालय व रुग्णालय, जळगावचा अधिष्ठाता पदाचा अतिरिक्त कार्यभार स्वीकारला होता. त्यावेळी जळगावच्या शासकीय वैद्यकीय महाविद्यालय व रुग्णालयाची गंभीर अवस्था होती. परंतु मागील सव्वा वर्षापासून डॉ. रामानंद यांनी रुग्णालयाचा पूर्ण कायापालट करून रुग्णसेवेचा दर्जा उंचावला आहे. अगदी रुग्णांना वैद्यकीय सेवा मिळण्यासाठी कुठलीही अडचण होऊ नये, यासाठी स्वतंत्र व्यवस्थापन तयार केले. तसेच सर्व दिव्यांग बांधवांना प्रमाणपत्र मिळण्याची कारवाई सोपी व्हावी, यासाठी पारदर्शक कुपन प्रणाली सुरू केली. या बाबी लक्षात घेता वैद्यकीय शिक्षण व औषधी द्रव्ये विभागाने डॉ. मिलिंद फुलपाटील यांची जळगावची बदली रद्द करून डॉ. जयप्रकाश रामानंद यांना कायम ठेवावे, अशी मागणी प्रवीण कोल्हे व मीनाताई सपकाळे यांनी केली आहे.
